«Ես կաʹմ պետք ա գողություն անեմ, կաʹմ էլ գնամ ինձ երեխեքիս հետ մոստից գցեմ». ձկնավաճառ կինը հուսահատված է

Համացանցում տարածվում է մի տեսանյութ, որտեղ 4 երեխաների մայրն, ով նախկինում փողոցում ձուկ վաճառելով էր հոգում իր բազմանդամ ընտանիքի նվազագույն կարիքները, պատմում է, թե ինչ անելանելի վիճակի մեջ է այժմ հայտնվել: Սայլակի վրա շրջելով նա օրական մի քանի հազար դրամի ձուկ է վաճառում և հավատացնում է, որ շուկայում, որտեղ իրեն օրավճարով տարածք են հատկացրել, ընդհանրապես առևտուր չի գնում: «Եվրոպական երկրների փորձը բերում են ու շըրըխկ՝ միանգամից կոտրում մեր գլխին, հաշվի չեն առնում, որ եվրոպացիք ապահովված են, գոնե մեզ ժամանակ տան: Եթե սա էլ արգելեն, ես կամ պետք է գողություն անեմ, կամ էլ գնամ ինձ մոստից գցեմ:

4 երեխա ունեմ՝ 17, 8, 4 և 3 տարեկան, ապրում ենք հանրակացարանի մի բնում, տուն էլ չի՝ իսկական բուն, ոʹչ խոհանոց, ոʹչ սանհանգույց, ամեն ինչ ընդհանուր է, անտանելի պայմաններ, հիմա էլ հացն անգամ չեմ կարողանում վաստակել, ես էմ միակ խնամողը, ես էլ պիտի գնամ ինձ երեխաներիս հետ մոստից գցեմ»,- ասում է հուսահատ կինը: