Տպել
«…Եթե այո, ապա տարածաշրջանը վերադասավորությունների նոր փուլի մեջ է, ինչի դեպքում ղարաբաղյան «ստատուս-քվոյի» փոփոխության հարցը չի բացառվում օրակարգային լինի:
Ասել է` հնարավոր է նախադեպի կիրառում նաև այս դեպքում: Հիշենք` դեռ տարիներ առաջ ամերիկյան հայտնի փորձագետները պնդում էին, որ փոքր միավորների ճանաչումը տարիներ հետո կլինի նոր քաղաքականության հիմքում: Չշտապենք` բոլոր դեպքերում:
Ինչ վերաբերում է Վիեննայում այսօր սպասվող հանդիպմանը, ապա հայկական կողմը կընտրի մանևրի և ժամանակ շահելու մարտավարություն, ինչը, եթե անկեղծ, նոր իշխանությունների համար մաքսիմում ծրագրի տեսանկյունից ընդունելի, մինիմումի տեսանկյունից` ուղղակի ֆիասկո է այն պարզ պատճառով, որ ներքին օգտագործման առումով իշխանությունը գրանցում է հերթական մանիպուլյացիան` «Ղարաբաղը պետք է լինի բանակցային կողմ» ասելով:
Հանրային, ներքաղաքական սպասումների առումով հայաստանյան զարգացումները նույնպես հետաքրքիր են: Տեղի է ունենում տոտալ դիրքավորում:
Իշխանություն. Մեղրու գնդում տեղի ունեցած խայտառակ միջադեպին համարժեք գնահատական տալու փոխարեն հավաքում է սպայակազմին` Տիգրան Ավինյանի դասախոսությունն ունկնդրելու-ակնդրելու:
Ընդ որում, երկրի ղեկավարը, որը հարկ չէր համարել Վազգեն Սարգսյանի 60-ամյակը գեթ մեկ բառով հիշելու, հարկ չհամարեց հրապարակային գեթ մեկ բառ ասել նաև Մեղրու անթույլատրելի բացթողման մասին, երբ առիթը բաց չի թողնում «լայվ» մտնելու։ Այս ամենին զուգահեռ` Քոչարյանի «հագով» նոր գործեր է «կարում», Վազգենի անցած ուղին է «փորփրում»` հենց Վազգենի զինակիցների ձեռքով, որոնք չեն խորշում իրենց դերակատարությունից, խիստ հնազանդ բացում են Օվերտոնի պատուհանը, քանզի Շիրխանյանի դեպքում բանտից ազատվելն այդ գինն ուներ, Անդրանիկ Քոչարյանի դեպքում` պատգամավոր ու հանձնաժողովի նախագահ դառնալը:
Ասացինք` տեղի է ունենում ներքաղաքական լայնածավալ շարժ. քոչարյանենք վաբանկ են գնում. խաղը նրանց համար գերկարևոր է ոչ այնքան քաղաքականության, որքան վերջինիս անազատության մեջ գտնվելու պատճառով:
Շատերը նկատեցին` գրեթե բանակային կարգապահությամբ ՀՀԿ-ն նշեց Անդրանիկ Մարգարյանի հիշատակի օրը. նշանային համակարգը խիստ տեսանելի էր` կանք ու այսպես կազմակերպված էլ մտնում ենք խաղի մեջ:
Արմեն Սարգսյանը. «Տետրիս» խաղի հեղինակը, Սթիվեն Հոքինգի գործընկերը դեռ կսպասի: Ամռանը Հայաստան կգա, ոչ ավել-ոչ պակաս Հենրի Քիսինջերը: Այն Քիսինջերը, որը, ըստ Շիրխանյանի, Վազգեն Սարգսյանին էր ներկայացրել Հայաստանի կոռումպացված չինովնիկների ցանկը»:
Կարմեն Դավթյան
