Տպել
Հայոց լեզու առարկայից կենտրոնացված քննություն հանձնող 9–րդ դասարանցիների 5.4 տոկոսն անբավարար է ստացել։ Այս մասին Sputnik Արմենիային հայտնեց Գնահատման և թեստավորման կենտրոնի մամուլի խոսնակ Խաչանուշ Գրիգորյանը։
«Մայիսի 26–ին կայացած հայոց լեզվի քննությանը մասնակցել է 31 021 սովորող: Նրանցից 1686-ը կամ 5.4 տոկոսն անբավարար է ստացել: 19-20 միավոր ստացել է 152 աշակերտ կամ քննություն հանձնածների 0.5 տոկոսը: Միջին միավորը կազմել է 12.16 բալ»,–ասաց նա։
Միջին հանրապետական բալից բարձր միջին ցուցանիշ է գրանցվել Սյունիքի մարզում` 12.52 բալ արդյունքով։ Նշենք նաև, որ «Հայոց լեզվից» քննություն հանձնողների թիվն ամենաքիչը Վայոց Ձորում է եղել` 541 իններորդցի, իսկ Երևանում քննություն հանձնողների թիվը եղել է 10 121 աշակերտ։
2018–ին 9–րդ դասարանի «Հայոց լեզվի» քննություն հանձնողների թիվը եղել է 29 186 աշակերտ, որից դրականի շեմը չի հաղթահարել 331-ը կամ 1.1 տոկոսը: 19-20 միավոր ստացել է 1612 աշակերտ կամ 5.5 %-ը. միջին գնահատականը եղել է 12.69 բալ: Նույնկերպ 2017–ին «Հայոց լեզվից» քննություն է հանձնել 29 084 աշակերտ, որոնցից 352-ը կամ 1.2 տոկոսն անբավարար են ստացել։ 19-20 միավոր է ստացել 1649 սովորող կամ 5.7 տոկոսը։ Միջին գնահատականը կազմել է 12.81 բալ:
Գրիգորյանի խոսքով` 9-րդ դասարանի ավարտական քննության արդյունքները, սակայն, նախորդ տարիների հետ համեմատելը տեղին չէ, քանի որ փոխվել է ինչպես քննության ձևը, այնպես քննական թեստի բովանդակությունը: «Այս տարի քննությունն անցկացվել է կենտրոնացված ձևով, իսկ թեստերը ներառել են և՛ սովորական թեստային առաջադրանքներ, և՛ ազատ շարադրանք: Նախորդ երկու տարիներին աշակերտները գրել են փոխադրություն»,–նշեց ԳԹԿ մամուլի խոսնակը։
Սրանք, ի դեպ, քննության նախնական արդյունքներն են, քանի որ այժմ բողոքարկման փուլն է և գնահատականները որոշակիորեն կարող են փոխվել: «Հայոց լեզվից» քննության վերջնական արդյունքները հայտնի կլինեն հունիսի 10–ին։
Հիշեցնենք, որ այս տարի 9-րդ դասարանցիները «Հայոց լեզու» առարկայից կենտրոնական քննություն հանձնեցին ոչ թե իրենց դպրոցներում, այլ կենտրոնացված քննական կենտրոններում։
