Տպել
Այժմ ցանկացած օգտատեր կարող է տեղադրել բջջային օպերացիոն համակարգի նոր տարբերակը iPhone-ում կամ iPad-ում: Մինչ այս բետա տարբերակը հասանելի էր միայն մշակողների համար:
Apple-ը ներկայացրել է iOS 13-ը և iPadOS-ը՝ պլանշետների համար, WWDC համաժողովում՝ հունիսի սկզբին: Այդ ժամանակից ի վեր համակարգի բետա տարբերակը կարող էր տեղադրվել միայն մշակողի պրոֆիլով, և դրա համար անհրաժեշտ էր համակարգիչ: Այժմ բետա տարբերակը դարձել է հանրային, և թարմացումը կարող է ներբեռնվել անմիջապես iPhone-ից կամ iPad-ից:
Ի՞նչ նորություններ են առկա
iOS 13-ում խոստանում են արագացնել հավելվածների բեռնումը մոտավորապես երկու անգամ: Բացի այդ, կհայտնվի մութ թեմա, ձայնի լրացուցիչ կարգավորում, Wi-Fi-ի և Bluetooth-ի արագ կարգավորում, լիցքավորման կարգավորում և այլն:
Բացի այդ, այս տարի Apple-ը վերջապես տարանջատեց սմարթֆոնների և պլանշետների համար նախատեսված համակարգերը: Հիմա արդեն կա iOS-ը, ինչպես նաև առանձին iPadOS-ը՝ ընկերության պլանշետների համար: Պլանշետների համար նախատեսված համակարգում առանձնացվել է աշխատանքային սեղան, որի վրա ավելի հեշտ և արագ կլինի աշխատել վիդջետներով: Բացի այդ, կատարելագործվել է մի քանի պատուհանների միաժամանակ աշխատանքը:
Ինչպե՞ս տեղադրել
Օպերացիոն համակարգերի թարմացված տարբերակը տեղադրելու համար պետք է գրանցվել ընկերության թեստավորման բաժնում: (https://beta.apple.com/sp/betaprogram/) Դրանից հետո պետք է պարզապես հետևել շատ պարզ մի քանի հրահանգի և բեռնելու համար ընտրել iOS 13 Public beta տարբերակը: Սրա համար անհրաժեշտ չէ անգամ համակարգիչ:
Հիշեցնենք, որ բետա տարբերակում կարող են առաջանալ խնդիրներ որոշ հավելվածների, ինչպես նաև GPS-ի հետ, քանի որ սա համակարգի փորձնական տարբերակն է: Դրա համար բետա տարբերակը բեռնելուց առաջ ցանկալի է ստեղծել բոլոր ֆայլերի ռեզերվային պատճենները և պահպանել դրանք ամպային պահոցում, կամ iTunes-ում:
IOS 13-ի վերջնական տարբերակը կհայտնվի աշնանը, ամենայն հավանականությամբ, սեպտեմբերի կեսերին՝ նոր iPhone-ների հետ միասին:
Apple-ը iOS 13-ի հետ հրաժեշտ տվեց մի շարք հին սմարթֆոնների. iPhone 5S, 6 և 6 Plus մոդելներն այս տարի թարմացումներ չեն ստանա:
Ահա բոլոր այն սմարթֆոնների ցուցակը, որոնք կստանան iOS 13 և iPadOS՝ iPhone 6S և 6S Plus, iPhone SE, iPhone 7 և 7 Plus, iPhone 8 և 8 Plus, iPhone X, XS, XS Max և XR, iPod Touch 7-ի սերունդը, iPad 2017 և 2018, iPad mini 4 և 5, iPad Air 2 և 3, iPad Pro-ի բոլոր մոդելները:
Սիրարփի Աղաբաբյան
