Զինված ու դիմակավորված ավազակային հարձակում Երևանի կենտրոնում․ քաղաքացին վնասազերծել է հանցագործին, վերջինս դիմակը թողնելով հանցագործության վայրում, ճողոպրել է. shamshyan.com
Advertisement 1000 x 90

Զինված ու դիմակավորված ավազակային հարձակում Երևանի կենտրոնում․ քաղաքացին վնասազերծել է հանցագործին, վերջինս դիմակը թողնելով հանցագործության վայրում, ճողոպրել է. shamshyan.com

Այսօր, հուլիսի 1-ին Ոստիկանության Երևան քաղաքի վարչության օպերատիվ կառավարման կենտրոն ահազանգ է ստացվել քաղաքացու կողմից, ով հայտնել է, որ հունիսի 29-ի լույս 30-ի գիշերը, ժամը 05։00-ի սահմաններում դիմակավորված ու հրացանով զինված ծալապակասը ներս է մտել Զաքյան փողոցի թիվ 5 հասցեում գործող Vivaro բուքմեյքերական ընկերության գրասենյակ և փորձել ավազակային հարձակում կատարել։

Ինչպես նշված վայրից հայտնում է ֆոտոլրագրող Գագիկ Շամշյանը, Vivaro-ում այդ պահին գտնվող քաղաքացին կարողացել է առանց վախենալու, վտանգելով իր կյանքը, աթոռով մի քանի մուշտի տալ զինված ու դիմակավորված ճիվաղին, ով իր սև գործը ավարտին չհասցնելով, դիմել է փախուստի։ Ֆոտոլրագրողը հայտնում է, որ զարմանալի է այն փաստը, որ կատարված հանցագործության մասին Vivaro-ի աշխատակիցները այսօր են որոշել իրավապահներին հայտնել։

Այս պահին նշված վայր են ժամանել Ոստիկանության կենտրոնական բաժնի օպերատիվ խումբը, բաժնի պետ Արման Պապյանի գլխավորությամբ։ Ժամանել են նաև Ոստիկանության Երևան քաղաքի վարչության և նույն վարչության քրեական հետախուզության բաժնի ծառայողները վարչության պետի օպեր գծով տեղակալ Ալիկ Մամիկոնյանի գլխավորությամբ։

Այս պահին դեպքի վայրում զննություն են կատարում Հայաստանի քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնի մեծ թվով քննիչներ բաժնի պետ Գարեգին Հովհաննիսյանի գլխավորությամբ։ Ոստիկանությունն ու քննչական բաժինը ձեռնարկում են անհրաժեշտ օպերատիվ հետախուզական և քննչական համատեղ միջոցառումներ՝ հանցագործությունը բացահայտելու, կատարողին և հանցագործության գործիք՝ հրացանը հայտնեբերելու ուղղությամբ։

Ոստիկաններն ու քննիչները դեպքի վայրում հայտնաբերել են գլխարկը, որը ծալապակասը օգտագործել է որպես դիմակ, դեմքը քողարկելու նպատակով։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

shamshyan.com