Տպել
Այսօր, հուլիսի 4-ին խոշոր ավտովթար է տեղի ունեցել Արարատի մարզում։ Ժամը 14։50-ի սահմաններում Երևան-Երասխ ավտոճանապարհի 23 կմ հատվածում բախվել են Hyundai մակնիշի 500 LL 70 համարանիշի և BMW մակնիշի 36 DA 441 համարանիշի ավտոմեքենաները։
Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով Hyundai-ն դուրս է եկել երթևեկելի գոտուց, բախվել ճանապարհի բաժանարար երկաթե արգելաշապատնեշներին, տապալել այն և հայտնվել ճանապարհի մեջտեղում։ Բախման հետևանքով ինչ-որ իր թռել է ճանապարհի հանդիպակաց երթևեկելի գոտի և վնասել դեպի Երևան ընթացող Nissan մակնիշի 17 AU 777 համարանիշի ավտոմեքենայի դիմապակին։
Ըստ նախնական տեղեկությունների՝ վթարի հետևանքով զոհեր և վիրավորներ չկան։ Դեպքի վայր են ժամանել Ճանապարհային ոստիկանության 2-րդ սպայական գումարտակի 2–րդ վաշտի ծառայողները վաշտի հրամանատար Վահան Էվինյանի, դասակի հրամանատար Կարապետ Հարությունյանի գլխավորությամբ։ Ըստ նախնական տեղեկությունների՝ վթարի մեղավորը եղել է BMW-ի վարորդը, ով դեպի Երասխ ընթանալիս, բախվել է Hyundai-ին ու դուրս եկել ճանապարհի երթևեկելի գոտուց, հայտնվել դաշտամիջյան հատվածում, ջրատարի մեջ։
Օպերատիվորեն ժամանել են նաև Ապահովագրական ընկերության ներկայացուցիչները։ Տեղում հետաքննչական աշխատանքները ղեկավարում է ՃՈ 2-րդ սպայական գումարտակի 1-ին վաշտի հետաքննիչ Անուշավան Սաղոյանը, ում կողմից փաստի առթիվ նյութեր են նախապատրաստվում։
Գ․ Շամշյանի տեղեկություններով՝ Hyundai-ի վարորդը Արարատի մարզի Լուսառատ գյուղի գյուղապետն է։
