Տպել
Ճարպակալման դեմ հաբեր և նույնիսկ դիետա գոյություն չունեն՝ պնդում է Ճարպակալման վիրաբուժության և նյութափոխանակության խանգարումների իսպանական միության (SECO) հիմնադիրներից մեկը՝ Ժոան Պուժոլ Ռաֆոլսը: Նրա խոսքով՝ ճարպակալմամբ տառապող մարդուն կարող է օգնել միայն կենսակերպի փոփոխությունը, սակայն քչերն են դրան պատրաստ:
Մասնագետի խոսքով՝ ժամանակակից աշխարհում ճարպակալման դեմ պայքարի միջոցները քիչ արդյունավետ են: Եվ այդ խնդրից ազատվելու համար անհրաժեշտ է փոխել կենսակերպը կամ դիմել վիրահատական միջամտությանը:
Բժիշկ Պուժոլի խոսքով՝ ճարպակալման դեմ պայքարում գլխավոր խնդիրը ոչ այդքան կիլոգրամներից ազատվելն է, այլ դրան հասնելուց հետո նորմալ քաշը պահպանելը:
«Չկա մի դիետա, որը կօգնի արդյունավետ պայքարել ճարպակալման դեմ, չկան նաև դրա դեմ հաբեր: Միակ հուսալի միջոցը հին կենսակերպը փոխելն է և առողջ սովորույթները պահպանելը: Մեծամասնությանը դա չի հաջողվում»,- ասել է բժիշկը:
Նրա խոսքով՝ ճարպակալման դեմ պայքարը բարդացնում է նաև այն փաստը, որ այդ խնդիրը հստակ պատճառ չունի: Պուժոլը նշել է մի քանի գործոն՝ նստակյաց կենսակերպ, ֆիզիկական ծանրաբեռնվածության բացակայություն և գենետիկ հակվածություն:
