Տպել
Երևանում արտակարգ դրության պայմաններում քաղաքային տրանսպորտի վիճակը վատթար է, սակայն ոչ կոլապսային: Կոլապսային, ծայրահեղ դեպքերի համար քաղաքն ունի ռեզերվային ավտոբուսներ: Այս մասին ասուլիսում հայտնեց Երևանի քաղաքապետի մամուլի խոսնակ Հակոբ Կարապետյանը` անդրադառնալով հարցին, թե Երևանի քաղաքային իշխանությունը որքանով է պատրաստ հնարավոր տրանսպորտային կոլապսին և ինչ այլընտրանքային տարբերակ կա քաղաքացիների փոխադրումը կազմակերպելու համար, եթե մասնավոր փոխադրողները դադարեցնեն աշխատանքը:
«Եթե հանկարծ այդպիսի իրավիճակի հասնենք, ապա Երևանի քաղաքային համայնքի ենթակայության տակ գտնվող «Երևանի ավտոբուս» ՓԲԸ-ն ունի ռեզերվային ավտոբուսներ: Այդ ավտոբուսները պահվում են հենց կոլապսային ծայրահեղ իրավիճակներից խուսափելու համար: Մենք, իհարկե, հիմա տրանսպորտի հետ կապված ունենք լարված և վատթար վիճակ, բայց կոլապսից հեռու ենք»,-ասաց Կարապետյանը:
Նա վստահեցրեց` այն դեպքերում, երբ մասնավոր փոխադրողները դադարեցնում են իրենց գործունեությունը, նաև այդ ռեզերվի միջոցով աշխատանքը վերականգնվում է:
