Տպել
ՀՀ դատախազությունը տեղեկացնում է, որ ապօրինի օտարված գույքը պետությանը և համայնքներին վերադարձնելու իրավական գործընթացներ է սկսել։
«2019թ. ընթացքում, ինչպես նաև 2020թ. առաջին եռամսյակում դատախազության իրականացրած ուսումնասիրությունների արդյունքում պարզվել են հանցավոր կոռուպցիոն սխեմայի գործողության բազմաթիվ դեպքեր: Մասնավորապես, ՀՀ պետական գույքի կառավարման վարչության պաշտոնատար անձինք, շատ դեպքերում առանց իրավական հիմքի և պայմանագիր կնքելու, 2016թ. N ՍՊԸ-ին առաջարկել են իրականացնել բազմաթիվ պետգույքերի գնահատման աշխատանքներ»,–նշված է հաղորդագրության մեջ։
ՍՊԸ-ն իրականացրել է գույքերի գնահատումներ, որոնցով ներկայացված արժեքների հիման վրա դրանք օտարվել են: Հետագայում կատարվել է նշված գույքերի՝ գնահատման և օտարման ժամանակահատվածի դրությամբ շուկայական արժեքների վերլուծություն, ինչի արդյունքում պարզվել է, որ դրանց արժեքը գնահատված արժեքից մի քանի անգամ բարձր է եղել։ Այսինքն` այդ ՍՊԸ-ի կողմից անշարժ գույքերի գնահատման գործընթացում խախտվել են գնահատման ստանդարտի պահանջները: Պետական սեփականություն հանդիսացող գույքի իրական արժեքները նվազեցվել են 2-3 անգամ:
Արդյունքում պաշտոնատար անձանց կողմից դրանք հիմք են դարձվել անշարժ գույքերի օտարման մրցույթի համար և օտարվել են շուկայական արժեքից մի քանի անգամ պակաս գնով: Ընդ որում՝ որոշ դեպքերում, երբ գույքի արժեքը գերազանցել է 50մլն դրամը, կեղծ հիմքեր են ստեղծվել շրջանցելու ՀՀ կառավարության 2003թ. հունիսի 13-ի թիվ 882-Ն որոշումը, որով սահմանվում է, որ նման դեպքում գույքը պետք է օտարվի ՀՀ կառավարության որոշման հիման վրա: Դրա հետևանքով գույքերն օտարվել են ՀՀ կառավարությանն առընթեր պետգույքի կառավարման վարչության պետի հրամանի հիման վրա:
2019թ. և 2020թ. առաջին եռամսյակում նման չարաշահումների առթիվ հարուցվել է 27 քրգործ՝ հիմնականում իրավասու պետական մարմինների պաշտոնատար անձանց կողմից պաշտոնեական լիազորությունները չարաշահելու, պաշտոնեական կեղծիք կատարելու հատկանիշներով:
Նշվում է, որ չնայած այդ գործերը գտնվում են քննության տարբեր փուլերում, սակայն արդեն իսկ քայլեր են ձեռնարկվում հանցավոր ճանապարհով օտարված գույքն իրական սեփականատերերին՝ պետությանը կամ համայքներին վերադարձնելու ուղղությամբ:
Օրինակ՝ ՀՀ ՀՔԾ-ում ԵԿՄ նախկին ղեկավար Մանվել Գրիգորյանի վերաբերյալ քննվող գործով ներկայացվել է հաղորդում՝ մի շարք համայնքների ղեկավարների կողմից համայնքներին պատկանող և օրենքի խախտմամբ օտարված կամ վարձակալությամբ տրված անշարժ գույքի՝ թվով 40 գործարքներն առ ոչինչ ճանաչելու և գույքերը համայնքներին վերադարձնելու գործընթաց սկսելու վերաբերյալ։
Մեկ այլ դեպքում առաջարկվել է հայց ներկայացնել օտարման ոչ ենթակա Ջրաձորի ջրանցքը, Ամասիայի ջրանցքը և դրա օգտագործման ու սպասարկման համար անհրաժեշտ 1.38 հեկտար մակերեսով հողամասը, 7060 քմ թունելը, ինչպես նաև ջրանցքները սպասարկող կառուցվածքներն ընկերությանն օտարելու գործարքներն առ ոչինչ ճանաչելու ու դրանք պետությանը վերադարձնելու նպատակով:
Ամբողջությամբ՝ armeniasputnik.am
