Տպել
Երեկ արդեն նշեցի, թե Ադրբեջանի ագրեսիան հարևան Թուրքիայում որչափ մասշտաբային աջակցություն է ստանում։ Երեկ գիշերը Թուրքիայի ԱԳՆ նախարարի մակարդակով «Քո հետ ենք, Ադրբեջան» կարգախոսը լայնորեն տարածվում էր ցանցում։
Այդ երկրի իշխող վերնախավը և, ընդհանրապես, Թուրքիայում վերջին տարիներին դոմինանտ դարձած իսլամական ազգայնականության գաղափարախոսությունը շարունակաբար և անթաքույց կերպով թիրախավորում են Հայաստանն ու հայերին, որը ձևավորում է նաև հասարակական կարծիքը։
Այսպես, ըստ Քադիր Հաս համալսարանի կողմից իրականացված ամենամյա սոցհարցումների այս տարվա արդյունքների, Հայաստանը Թուրքիայի համար սպառնալիք ներկայացնող գլխավոր երկրներից մեկն է (տե՛ս կից աղյուսակը)։ Ուշադրություն դարձրե՛ք, թե ինչ շրջապատ ենք ընկել։
Իսկ արդեն երկու օր տևող քարոզչական պատերազմում պարբերաբար դրսևորվում են թուրքերի՝ ավելի խորը արմատներ ունեցող այն տեսակետները, որոնցում Հայաստանը ընկալվում է ոչ թե պարզապես թշնամի, այլ «չիբան», որն աճել է Թուրքիայի և Ադրբեջանի միջև։
Մեր երկու հարևան երկրները, բացի ուժից, որևէ այլ լեզու չեն ընկալում։ Թե՛ դիվանագիտական, թե՛ ռազմի դաշտում կայացած ու նախաձեռնող Հայաստանը չունի որևէ այլընտրանք։
Վարուժան Գեղամյանի ֆեյսբուքյան էջից
