Տպել
Ինչպես հայտնի է, այսօր Արցախի Պաշտպանության բանակի նախկին հրամանատար, գեներալ-լեյտենանտ, 44-օրյա պատերազմի ժամանակ «Արցախի հերոս» կոչում ստացած Ջալալ Հարությունյանը դուրս է գրվել հիվանդանոցից։
Պատերազմը հենց Արցախում բազմիցս լուսաբանած սիրիացի լրագրող Աբբաս Ջուման իր համանուն «Abbas Djuma» տելեգրամյան ալիքում լուսանկար է հրապարակել, որում պատկերված է Արցախի Մարտունի քաղաքի բնակիչ Ռոբերտը։ Լրագրողը գրել է, որ նա է փրկել Ջալալ Հարությունյանի կյանքը։
«Հարությունյանի ինքնաձիգն ու զրահաբաճկոնը Ռոբերտի տանն են»,- նշել է Ջուման։
Նշենք, որ Մարտունիում Հարությունյանը ծանր վիրավորում է ստացել պատերազմի ժամանակ։ Ադրբեջանական կողմը տեսանյութ էր հրապարակել՝ պնդելով, որ դրանում երևում է, թե ինչպես է Անօդաչու թռչող սարքը հարված հասցնում Հարությունյանին տեղափոխող մեքենային, սակայն հայկական կողմը հերքել էր տեսանյութի իսկությունը։
ՊԲ նախկին հրամանատարի վիրավորման մասին պաշտոնական տեղեկատվությունը հաստատվել էր հոկտեմբերի 27-ին։ Նույն օրը ՊԲ հրամատար էր նշանակվել Միքայել Արզումանյանը և ստացել գեներալ-լեյտենանտի կոչում։
