Պապիկյանի ասֆալտը «պադվադիտ» է անում

Նիկոլ Փաշինյանն ու իր թիմը, ինչպես հայտնի է, վաղուց սկսել են նախընտրական քարոզարշավն ու քողարկված քարոզչություն են իրականացնում, ինչն անթույլատրելի է։ Նրանք նաեւ սկսել են անուղղակի կերպով կաշառել բնակչությանը՝ իրենց կատարած աշխատանքներով, որն ընդամենը իրենց պարտականությունն է։ Ինչպես տեղեկացնում է Hraparak.am-ը, այս հարցում հատկապես ակտիվ աշխատանքների է լծվել տարածքային կառավարման եւ «ասֆալտաշինության» նախարար Սուրեն Պապիկյանը, որն ամեն օր իր ֆեյսբուքյան էջում այս կամ այն համայնքում ասֆալտ փռելու աշխատանքների մասին է ազդարարում։ Քանի որ այս իշխանությունների աշխատանքի միակ տեսանելի «արդյունքն» ասֆալտն է, նրանք կարծում են, որ այսքանից հետո էլի ժողովրդին կարող են «կաշառել» ասֆալտով՝ որպես Արցախը հանձնելու եւ հազարավոր զոհերի դիմաց արվող «փոխհատուցում»։

Ի դեպ, եթե ինչ-որ գյուղերում Պապիկյանն ասֆալտ է անում՝ հավանաբար առանց «ատկատի», ապա թե՛ Երեւան քաղաքում, թե՛ Երեւան-Սեւան մայրուղում այդ նույն ասֆալտն աչքի առաջ քանդվում է։ Անցած տարի արված ասֆալտը, որը «մատի փաթաթան» էին դարձրել, եւ մարդիկ էլ դա էին նշում՝ որպես այս իշխանությունների 3 տարվա միակ ձեռքբերում, ամենուրեք քարուքանդ է եղել։ Եվ ոչ միայն անցած տարվանը։ Օրինակ՝ մայրուղուց դեպի Թբիլիսյան խճուղի մտնող հատվածում ընդամենը մեկ-երկու ամիս առաջ լցրած փոսերը նորից բացվել են, Թբիլիսյան խճուղու ալիքավոր հատվածների եւ իբրեւ թե լցրած փոսերի մասին էլ չասենք։