Տպել
Արցախում կորոնավիրուսի վարակի տարածման արագ տեմպը կանխելու համար ԱՀ կառավարությանը որոշ ժամանակավոր սահմանափակումներ է սահմանել։
Կառավարության որոշումն ուժի մեջ է մտնում հոկտեմբերի 13-ից:
ԱՀ պետական նախարար Արտակ Բեգլարյանը, Facebook-ում կատարած գրառման մեջ ներկայացնելով որոշման մանրամասները, նշում է, որ հանրակրթական բոլոր հաստատություններում աշնանային արձակուրդները կլինեն հոկտեմբերի 18-ից նոյեմբերի 1-ը։ Իսկ բարձրագույն ուսումնական հաստատություններում ուսուցումը կանցկացվի հեռավար։
Հոկտեմբերի 13-ից սկսած կարգելվի սպասարկման գրասենյակներ հաճախորդների մուտքն առանց դիմակների։ Զանգվածային միջոցառումները կանցկացվեն անհատական պաշտպանության միջոցների կիրառմամբ ու սանիտարահամաճարակային անվտանգության կանոնների պահպանմամբ։
Փակ տարածքներում միջոցառումները կթույլատրվեն առավելագույնը 120 հոգու մասնակցությամբ, դիմակ դնելը կլինի պարտադիր է բոլորի համար, բացառությամբ՝ մինչև 10 տարեկան երեխաների, իրենց տանը գտնվող քաղաքացիների, Արցախի Հանրապետության նախագահի, Հայաստանյայց Առաքելական Սուրբ Եկեղեցու Արցախի Թեմի առաջնորդի, Արցախի Հանրապետության Ազգային ժողովի նախագահի, Արցախի Հանրապետության պետական նախարարի, Արցախի Հանրապետության Գերագույն դատարանի նախագահի, Բարձրագույն դատական խորհրդի նախագահի գլխավորությամբ անցկացվող արարողակարգային միջոցառումների ժամանակ ելույթ և ուղերձ ունեցողների և միջոցառման անմիջական մասնակիցների։
Լրագրողներն ու սպասարկող անձնակազմը ևս պարտավոր են լինել դիմակներով։
Արցախում հոկտեմբերի 11-ին կատարվել է 86 թեստավորում, գրանցվել է կորոնավիրուսային հիվանդության 7 նոր դեպք։
Ըստ Արցախի առողջապահության նախարարության` կորոնավիրուսային հիվանդությամբ այս պահին ստացիոնար բուժում է ստանում 54 վարակակիր, 5 հիվանդի առողջական վիճակը գնահատվում է ծանր։
Արցախում 2021-ի ընթացքում իրականացվել է 13 հազար 897 քաղաքացու հետազոտություն, գրանցվել է հիվանդության 1237 դեպք։
