Հանցագործության մասին հաղորդում ներկայացվեց՝ Փաշինյանի կողմից պաշտոնեական լիազորություններն անցնելու հատկանիշներով

«Քաղաքացիական խորհուրդ» ՀԿ ներկայացուցիչները հանցագործության մասին հաղորդում ներկայացրին ՀՀ գլխավոր դատախազություն՝ Նիկոլ Փաշինյանի կողմից իր պաշտոնեական լիազորություններն անցնելու դեպքի առթիվ։

Նշենք, որ «Քաղաքացիական խորհուրդ» ՀԿ-ն բողոքի ակցիա է իրականացնում՝ պահանջելով կասեցնել կապիտուլյացիոն գործընթացը։ Նրանք Գարեգին Նժդեհի հրապարակում պատռել են նոյեմբերի 9-ի լույս 10-ին ստորագրված հայտարարությունը՝ որպես «սև թուղթ», ապա քայլերթ են իրականացրել դեպքի ՀՀ գլխավոր դատախազության շենք՝ հաղորդումը ներկայացնելու։ Հաղորդման պատճենը նրանք հանձնել են նաև կառավարությանը։

Ակցիայի մասնակիցները գտնում են, որ Փաշինյանը, ստորագրելով եռակողմ հայտարարությունը և Ադրբեջանի վերահսկողության ներքո հանձնելով Արցախի տարածքները, խախտել է սահմանադրական կարգը և անցել իր լիազորությունները։ Ակցիայի մասնակիցների խոսքով՝ նոյեմբերի 9-ի լույս 10-ի գիշերը ստորագրված եռակողմ հայտարարությունն ապօրինի, ապօրինածին փաստաթուղթ է, որը ստորագրելու իրավունք Փաշինյանը չուներ։

Հանցագործության մասին հաղորդումը ներկայացնելուց հետո ակցիայի մասնակիցները քայլերթով շարժվեցին դեպի «Եռաբլուր» զինվորական պանթեոն՝ հարգանքի տուրք մատուցելու Արցախյան երրորդ պատերազմում նահատակված հայորդիների հիշատակին։

Աղբյուր` Փաստինֆո