«Ուղիղ եթերում հիմնավորեց՝ ալիևները ճիշտ էին, հայ ժողովուրդը՝ սխալ». Աշոտյան

ՀՀԿ փոխնախագահ Արմեն Աշոտյանը ֆեյսբուքյան իր էջում գրել է․

«Նիկոլն ասում է ՝ տարան Արցախի ինքնորոշման իրավունքը «գցեցին» ՄԱԿ-ի Անվտանգության խորհուրդ՝ որակավորելով դա որպես աղետ: Արցախյան հարցում աղետ եղավ, երբ Նիկոլ Փաշինյանի նման անբարոյական մարդը Հայաստանում եկավ իշխանության: Իրականում՝ 1993-ին, ՄԱԿ-ի Անվտանգության խորհուրդն ընդունեց 4 բանաձև, որոնց նպատակը Արցախում ռազմական գործողությունները կանգնեցնելն էր, ոչ թե՝ Արցախի կարգավիճակի որոշումը, ինչպես ներկայացնում է սրիկան: 92 թվականին արդեն ստեղծվել էր Մինսկի խումբը, որը 94-95-ին ստացավ մանդատ՝ կարգավիճակը քննարկելու:

Այսինքն, եթե ՄԱԿ ԱԽ-ն որոշում էր Արցախի կարգավիճակը, ինչպես պնդում է Նիկոլը, ուրեմն Մինսկի խումբն ինչ նպատակով էր ստեղծվել: Հաջորդը՝ Ադրբեջանը 30 տարի այդ բանաձևերը փորձել է խեղաթյուրել և օգտագործել Հայաստանի դեմ:

Նիկոլ Փաշինյանը Հայաստանի առաջին ղեկավարն է, որ հայկական ուղիղ եթերում գրեթե բառացիորեն ցիտել է Ալիևի հոր և տղայի քաղաքական դիրքորոշումները՝ հիմնավորելով, որ ալիևները ճիշտ էին, իսկ հայ ժողովուրդը՝ սխալ:

Այսինքն, Նիկոլի ասած «սենսացիան» այն էր, որ ինքն առաջին «յան»-ով վերջացող ղեկավարն է, որ ցիտել է ադրբեջանական տեսակետ ու հիմնավորել է դա»: