Տպել
Այսօր` ժամը 21:53-ի սահմաններում, շտապօգնության կայանից ԱԻՆ փրկարար ծառայության Գյումրիի ճգնաժամային կառավարման կենտրոն ահազանգ է ստացվել, որ Բուլվարային թաղամասից Սևերսկի գնացող ճանապարհին բեռնատար է կողաշրջվել, մեքենայում կա արգելափակված քաղաքացի, անհրաժեշտ է փրկարարների օգնությունը:
Դեպքի վայր է մեկնել մեկ մարտական հաշվարկ, պարզվել է, որ վրացական բեռնատարի վարորդը, կորցնելով մեքենայի կառավարումը, դուրս է եկել երթևեկելի գոտուց և կողաշրջվել:Ծանրաքարշ ավտոմեքենան բեռնված է եղել ձկների համար նախատեսված կերով:
Գյումրիի ճգնաժամային կառավարման կենտրոնից SHANTNEWS.am-ին փոխանցեցին, որ մինչ փրկարարների դեպքի վայր հասնելը, վարորդին մեքենայից դուրս են բերել անցորդները, նա շտապօգնության ավտոմեքենայով տեղափոխվել է «Գյումրի» ԲԿ, այս պահին իրականացվում են լաբորատոր-գործիքային հետազոտություններ, վրացի վարորդի կյանքին վտանգ չի սպառնում:
