Ղրիմի կամրջի պայթյունի կազմակերպման գործով ՀՀ քաղաքացի է ձերբակալվել․ նա Արթուր Տերչանյանն է

Ղրիմի կամրջի վրա պայթյունի կազմակերպիչը եղել է Ուկրաինայի ռազմական հետախուզության ղեկավար Կիրիլ Բուդանովը, հայտնում է ԱԴԾ-ն։ Հետախուզության տվյալներով՝ հարձակման նախապատրաստմանը մասնակցել է նաև 12 մարդ, նրանցից ութը բերման է ենթարկվել։ Նրանց թվում են Ռուսաստանի հինգ, Ուկրաինայի և Հայաստանի երեք քաղաքացիներ։ Ռումբը քողարկվել է գլանափաթեթներով 22 770 կգ քաշով 22 ծղոտե ներքնակով, ավելացրել է ԱԴԾ-ն, գրում է Kommersant-ը:

Քննիչների տվյալներով՝ պայթուցիկ սարքը օգոստոսի սկզբին Օդեսայի նավահանգստից բուլղարական Ռուսե քաղաք է ուղարկվել։ Ենթադրվում է, որ ուկրաինացիներ Ցյուրկալո Միխայիլ Վլադիմիրովիչը (ծնված 1975թ.), Կովաչ Դենիս Օլեգովիչը (1979թ.), Սոլոմկո Ռոման Իվանովիչը (1971թ.), ինչպես նաև Վրաստանի քաղաքացիներ Ինոսարիձե Սանդրոն և Լևան անունով միջնորդը, ՀՀ քաղաքացի Արթուր Տերչանյանը (1985թ.) ներգրավված են փոխադրման մեջ:

«2022 թվականի սեպտեմբերի 29-ից հոկտեմբերի 3-ը Երևանի Transalliance տերմինալում բեռը մաքսազերծվել է ԵվրԱզԷՍ-ի կանոններով և փաստաթղթերը փոխարինվել, որից հետո այն արդեն ուղարկվել է GU AR GROUP ՍՊԸ-ի կողմից (Հայաստանի Հանրապետություն, Ալավերդի), իսկ ստացողը Լիդեր ՍՊԸ-ն է (Մոսկվա)»,- հայտնել են ԱԴԾ-ից (մեջբերումը՝ «Ինտերֆաքս»-ից):

Ինչպես հայտնի է, հոկտեմբերի 8-ին Ղրիմի կամրջի վրա բեռնատար է պայթեցվել։ Այրվել է գնացքի վառելիքի 7 բաք։ Չորս մարդ մահացել է։ Վնասը նախապես գնահատվել է 200-500 մլն ռուբլի։ Ռուսաստանը կատարվածը համարում է ահաբեկչություն և դրա համար մեղադրում է Կիևին։ Պաշտոնապես Ուկրաինան չի ստանձնել արտակարգ իրավիճակի պատասխանատվությունը։

Բուլղարիայի իշխանությունները հայտնել են, որ կամրջի վրա պայթեցված բեռնատարը երբեք երկրում չի եղել։