Տպել
FlyOne Armenia ավիաընկերության՝ Երեւան-Դուբայ չվերթն իրականացնող ինքնաթիռի հարկադրված վայրէջքի պատճառը փաստաթղթերին առնչվող խնդիրներն են եղել։ Այս մասին NEWS.am-ի հետ զրույցում ասաց Քաղաքացիական ավիացիայի կոմիտեի ղեկավարի օգնական Լիլիթ Աղաբեկյանը։
«Փաստաթղթերի հետ կապված թյուրիմացություն է առաջացել, բայց չի նշանակում, որ ավիաընկերությունը փաստաթղթեր չի ներկայացրել կամ թերի փաթեթ է ներկայացրել»,- ասաց Աղաբեկյանը։
Հիշեցնենք, որ «FlyOne Armenia» ընկերության՝ Երեւան-Դուբայ չվերթը սպասարկող ինքնաթիռը երեկ՝ մայիսի 7-ին, վայրէջք էր կատարել Իրանում՝ Շիրազի օդանավակայանում։
Ընկերությունն ավելի ուշ հայտնել էր, որ դեռեւս լրացուցիչ պարզաբանման կարիք ունեցող հիմնավորմամբ՝ մայիսի 7-ին Դուբայի օդային երթեւեկության կարգավարները թույլ չեն տվել ավիաընկերության՝ Դուբայ-Երեւան չվերթն իրականացնող օդանավին մուտք գործել Դուբայի օդային տարածք։ Օդանավը վայրէջք է կատարել Շիրազի օդանավակայանում՝ մինչեւ խնդրի պարզաբանումը։
