Տպել
Եվրախորհրդարանի (ԵԽ) համապատասխան հանձնաժողովների պատգամավորները համաձայնել են խորհրդակցություններ սկսել արհեստական ինտելեկտի մասին օրենքի շուրջ, ասվում է Եվրախորհրդարանի մայիսի 11-ին հրապարակված հայտարարության մեջ։
Փաստաթղթում նշվում է, որ եթե օրենսդրական նորմերը հաստատվեն, ապա ԵՄ-ում կհայտնվեն արհեստական ինտելեկտի համար աշխարհում առաջին կանոնները։
Եվրախորհրդարանի ներքին շուկայի և քաղաքացիական ազատությունների հանձնաժողովներն արդեն հաստատել են արհեստական ինտելեկտի համակարգերի կանոնների շուրջ բանակցությունների մանդատը, որը պաշտոնապես պետք է հաստատվի հունիսին պառլամենտի լիագումար նիստում: Այնուհետեւ նրանք կսկսեն բանավեճերը Եվրամիության խորհրդի հետ՝ օրենքի վերջնական տեքստի շուրջ։
Նշվում է, որ 2 տարի առաջ ԸՕ-ի առաջարկած օրինագծի առաջին տարբերակում ավելի քան 3000 փոփոխություն է կատարվել։ Հիմնական շեշտը դրվում է այն փաստի վրա, որ արհեստական ինտելեկտը կմնա մարդու վերահսկողության տակ, ինչպես նաև նման համակարգերի հուսալիության, թափանցիկության և հետագծելիության պահանջները:
Առաջարկվում է նաև արգելել AI համակարգերը, որոնք վտանգ են ներկայացնում մարդու անվտանգության համար։ Խոսքը, մասնավորապես, մանիպուլյացիայի տեխնիկայի կամ խոցելիության օգտագործման մասին է։ Բացի դրանից, խորհրդարանականներն առաջարկում են արգելել իրական ժամանակի հեռավոր կենսաչափական նույնականացման համակարգերը հասարակական վայրերում և սահմանափակել կենսաչափական տվյալների հավաքագրումը սոցիալական ցանցերում։
