Տպել
Որոշ ֆայլեր հեռախոսում պահելը վտանգավոր է: Առաջին հերթին դրանք ներառում են անձնագրի պատճենները և ինտիմ բնույթի լուսանկարները, նշում է տեղեկատվական և համակարգչային անվտանգության ոլորտի փորձագետ Սերգեյ Վակուլինը:
Ինչպես նշում է «Երեկոյան Մոսկվան», նման ֆայլերը հեռախոսում պահելու սովորությունը կարող է հանգեցնել դրանց արտահոսքի։ Եվ եթե դրանք ընկնեն խաբեբաների ձեռքը, նրանք կարող են դրանք օգտագործել տարբեր ձևերով եւ ձեզ վնաս հասցնել:
«Գրեթե բոլոր հեռախոսները և այլ տեխնիկական միջոցները միացված են համաշխարհային ինտերնետ ցանցին, ուստի դրանք կարող են կոտրվել: Սակայն, եթե սարքը միացված չէ համացանցին, ապա հնարավոր չի լինի տվյալները հափշտակել հեռակա կարգով»,- նշել է մասնագետը։
Նա հիշեցրել է, որ չարագործները հաճախ դիտավորյալ տարածում են վիրուսներ, որոնք հավաքում են մարդկանց սմարթֆոնների ամբողջ տեղեկատվությունը՝ թե անօգուտ, թե այն տեղեկատվությունը, որը կարող է նրանց համար որոշակի արժեք ունենալ: Դրանք կարող են լինել ինտիմ բնույթի լուսանկարներ, բանկային քարտեր, վկայականներ, տոմսեր և անձնական տվյալներով փաստաթղթեր:
Հակավիրուսային ծրագրերը միշտ չէ, որ կարողանում են սարքերը պաշտպանել հաքերային հարձակումներից։ Ուստի մասնագետը խորհուրդ է տալիս կարևոր ֆայլերը չպահել սմարթֆոնի հիշողության մեջ, այլ օգտագործել պաշտպանված կրիչներ, որոնք միացված չեն ցանցին։ Նա նաև խորհուրդ է տալիս կանոնավոր կերպով փոխել գաղտնաբառերը և չբացել կասկածելի հղումներ, որոնք ուղարկվում են էլեկտրոնային փոստին կամ մեսենջերներին։
