Տպել
Նոր Apple iPhone 15-ը, ամենայն հավանականությամբ, կներկայացվի սեպտեմբերի 13-ին: Այս եզրակացությանն է եկել 9to5mac պորտալը՝ հիմնվելով այն տեղեկատվության վրա, որ հեռահաղորդակցության ամերիկյան օպերատորներն իրենց աշխատակիցներին կոչ են արել սեպտեմբերի 13-ին արձակուրդ չգնալ, քանի որ նոր սմարթֆոնի անոնս է սպասվում։
Եթե Apple-ը իսկապես ներկայացնի նոր iPhone 15-ը սեպտեմբերի 13-ին, ապա այս սմարթֆոնների նախնական պատվերները կսկսեն ընդունվել արդեն ուրբաթ՝ սեպտեմբերի 15-ին, իսկ պաշտոնական վաճառքը կսկսվի մեկ շաբաթ անց՝ սեպտեմբերի 22-ին։
Անցյալ տարի iPhone 14-ի անոնսը տեղի ունեցավ սեպտեմբերի 7-ին, նախնական պատվերները սկսվեցին երկու օր անց, իսկ խանութներում վաճառքը սկսվեց սեպտեմբերի 16-ին։
Որոշ տեղեկությունների համաձայն՝ սպասվում է iPhone 15 Pro-ի դեֆիցիտ, ինչն իր հերթին կարող է հանգեցնել վաճառքի մեկնարկի հետաձգման։ Անցյալ տարի մատակարարման հետ կապված խնդիրների պատճառով iPhone 14 Plus-ի թողարկումը հետաձգվեց գրեթե մեկ ամսով։ Նույն իրավիճակը տեղի ունեցավ 2020 թվականին՝ iPhone 12 Pro Max-ի և 12 mini-ի թողարկման ժամանակ։
Ակնկալվում է, որ iPhone 15-ը կզարմացնի իր երկրպագուներին նոր դիզայնով, որը ներառում է մի փոքր կոր եզրեր և ավելի բարակ շրջանակներ էկրանի շուրջ: Շարքի բոլոր մոդելները կստանան թարմացված Face ID կտրվածք և Dynamic Island տեսախցիկ, մինչդեռ Lightning միակցիչը իր տեղը կզիջի USB-C պորտին, որն էլ ավելի հարմար կդարձնի սմարթֆոնի օգտագործումը։
Մյուս կողմից, շարքի սմարթֆոնները կարող են թանկանալ անցյալ տարվա սարքերի համեմատ։ Այսպիսով, iPhone 15 Pro-ն 100 դոլարով ավելի կլինի iPhone 14 Pro-ից, իսկ iPhone 15 Pro Max-ը՝ 100-200 դոլարով ավելի, քան iPhone 14 Pro Max-ը։
Այս առումով, ինչպես նաև հաշվի առնելով որոշ այլ գործոններ, որոշ փորձագետներ կարծում են, որ շարքի սմարթֆոնների պահանջարկը, ամենայն հավանականությամբ, կլինի շատ համեստ, նույնիսկ ավելի ցածր, քան անցյալ տարվա iPhone 14-ը:
