Տպել
Հարավկորեական Samsung ընկերությունն ամենամյա CES ցուցահանդեսի ժամանակ ներկայացրել է աշխարհում առաջին թափանցիկ Micro-LED էկրանը։ Ընդորում՝ ընկերությունը ներկայացրել է միանգամից երեք այսպիսի էկրան։
Այս պահին տեղեկություններ չկան թափանցիկ Micro-LED էկրանների գնի, ինչպես նաև սպառողական սարքերում այս տեխնոլոգիայի հայտնվելու ժամկետների վերաբերյալ։ Չնայած դրան, Samsung-ը ցուցադրել է միանգամից երեք թափանցիկ Micro-LED էկրան՝ միմյանցից տարբերվող դիզայնով։
Էկրաններից երկուսն ունեն մգեցված ապակի, ինչի շնորհիվ ավելի հեշտ է անտեսել էկրանի հետևում գտնվող ցանկացած բան: Սակայն երրորդ էկրանը լիովին թափանցիկ է, ինչպես սովորական ապակին, և պահպանել է առանց շրջանակի դիզայնը։
Samsung-ի թափանցիկ Micro-LED էկրանների ազդեցությունը հեռուստադիտողների վրա դժվար է նկարագրել բառերով, քանի որ հեռարձակվող բովանդակությունը գրեթե օդում լողացող հոլոգրամի է նման: Ցուցադրված բոլոր երեք էկրաններն ունեն մոտ մեկ սանտիմետր հաստություն, ինչն ավելացնում է լողացող էկրանի պատրանքը, իսկ Micro-LED վահանակի պիքսելային բարձր խտությունը պատկերները դարձնում է աներևակայելի պարզ:
Samsung-ի ներկայացուցիչը հիշեցրել է, որ թափանցիկ Micro-LED էկրաններն ավելի բարձր պայծառություն ունեն, քան թափանցիկ OLED էկրանները, ինչը նշանակում է, որ դրանք ավելի քիչ են ենթարկվում շրջակա միջավայրի լույսի ազդեցությանը: Այնուամենայնիվ, հաշվի առնելով Samsung-ի արդեն թողարկված Micro-LED հեռուստացույցների գինը, որոնք արժեն մոտ $150,000 110 դյույմանոց մոդելի համար, պարզ է դառնում, որ դեռ որոշ ժամանակ կպահանջվի մինչև թափանցիկ Micro-LED էկրանները դուրս գան սպառողական շուկա:
