Տպել
Անթույլատրելի է ջրատար խողովակը թողնել գետի հոսող ջրի մեջ։ Այս մասին Երևանի քաղաքապետարանի գործակարգավարական խորհրդակցության ժամանակ հայտարարեց քաղաքապետի խորհրդական Կամո Արեյանը` խոսելով Արզնի-2 ջրատարի՝ Հրազդան կիրճի հատվածում կրկին վթարվելու մասին։
Նշենք, որ հունիսի 27-ին հայտնի դարձավ, որ «Արզնի 2» ջրատարը վթարվել է, որի հետևանքով հունիսի 27-ին ժամը 18:30-ից մինչև հունիսի 28-ը ժամը 23:00-ն դադարեցվել էր Երևանի Արաբկիր վարչական շրջանի մի շարք հասցեների ջրամատակարարումը։
Ըստ նրա՝ «Վեոլիա ջուրը», բարեբախտաբար, ճիշտ ժամանակին կարողացել է փականն անջատել, որպեսզի ջրի վարակի դեպք չգրանցվի Արաբկիրում։
«Գետի հունի մաքրման աշխատանքները մեկնարկել են։ Եթե այդ աշխատանքները չարվեն, ոչ մի երաշխիք չկա, որ պարբերաբար նման վթարները չեն կրկնվի»,–ասաց նա։
Արեյանը հավելեց, որ ձեռնարկվել են համապատասխան աշխատանքներ, և վթարի հաջորդ օրը՝ ժ․23։00, ջրամատակարարումը միացվել է։
Արեյանը հույս հայտնեց, որ կարճ ժամանակահատվածում ամբողջ փլուզված հատվածը դուրս կբերվի, գետի հունը կփոխվի, կմաքրվի և ջրատարը կազատվի հոսող ջրի այդ ծավալից։
Հիշեցնենք, որ 2023–ի փետրվարի 7–ին «Արզնի 2-Երևան» ջրատարը կրկին վթարվել էր, և Արաբկիրի որոշ հասցեներում 36 ժամով ջրամատակարարումը դադարեցվել էր։ Բայց այս անգամ պատճառը Արաբկիրի Կորեայի ձոր կոչվող հատվածում ապօրինի քարաթափումն էր եղել։
