Տպել
Մարտի 13-ին Hayastan24.com կայքում սկանդալային ձայնագրություն հրապարակվեց, որում լսվում էր, թե ինչպես է ընկերության ղեկավարներից մեկը աշխատակիցներին հորդորում ապրիլի 2-ի խորհրդարանական ընտրություններից առաջ աշխատել Արտակ Սարգսյանի համար, մտերիմներին, հարազատներին ուղղորդել քվեարկել նրա օգտին՝ այլապես կկանգնեն աշխատանքը կորցնելու վտանգի առջև:
Ժողովն անցկացնողը հատկապես բարձրաձայն հնչեցնում էր մեծ թվով ձայներ բերածների և ձայներ չբերածների անունները՝ առաջիններին ամոթանք տալով, երկրորդների համար ծափահարություններ պահանջելով:
Մեզ հաջողվել է զրուցել Արտակ Սարգսյանի համար ձայներ չբերածներից մեկի՝ Սիրանուշ Թումասյանի հետ: Սկանդալային ձայնագրությունում լսվում է, որ նրա մասին խոսելով ժողովը վարողը ասում էր. «Սիրանուշ Թումասյան: Յա, մազերդ տենց սիրուն ներկել ես, զուգվել-զարդարվել ես, գիտես պտի էսօր մեծարման երեկո՞ անենք, հա՞ 0 ձայներիդ համար: Ամոթ չե՞ս անում, Սիրանուշ: Ամոթ ա, չէ՞: Որտե՞ղ ես ապրում, Թաիրո՞վ: Կապ չունի, տեսա՞ք մարդը ռայոնից 15 ձայն ա բերել»:
Ներկայացնենք մեր զրույցը Սիրանուշ Թումասյանի հետ:
– Սիրանուշ, «ՍԱՍ»-ի ժողովի ձայնագրության մեջ ձեր անունն էր հնչում, որ ձայներ չեք բերել: Ուզում էի իմանալ ձեր համար խնդիր առաջացա՞վ, թե՞ ոչ:
– Որ ձայներ չենք բերե՞լ: Հա: Չէ-չէ, բան չի եղել:
– Որևէ ձևով չպատժեցի՞ն ձեզ:
– Չէ, չէ, չեն պատժել:
– Աշխատո՞ւմ եք, շարունակո՞ւմ եք աշխատել:
– Չեմ աշխատում, բայց պատճառը դա չի:
– Դո՞ւրս եք եկել աշխատանքից:
– Չէ, ես ուղղակի մեկի տեղն էի փոխարինում, ինքը արդեն եկել է, թե չէ խնդիրներ չի առաջացել:
– Ձայնագրությունում ասվում է, որ 0 ձայն եք բերել, հետո ձայներ տարա՞ք, թե՞ չէ:
– Ի՞նչ ձայնագրություն:
– Լրատվամիջոցներով տարածվել էր ձեր ժողովի ձայնագրությունը, որտեղ աշխատակիցներից մեկին հարցնում էին՝ ով ինչքան ձայն է բերել:
– Հա, դե էդ բոլորն էլ գիտեն: Մենակ ես չէի, բոլորին հերթով զանգո՞ւմ եք:
– Եթե բոլորին կարողանանք գտնել՝ զանգելու ենք:
– Չէ, չէ, խնդիրներ չեն եղել:
– Մյուս գործընկերներն է՞լ խնդիրներ չեն ունեցել:
– Չէ, բոլորն էլ աշխատում են:
– Բա ինչո՞ւ էին էդպես վախեցնում: Ո՞վ էր ձեզ հետ նման կոպիտ տոնով խոսողը:
– Ես չգիտեմ, կոպիտ չէր, երևի իր խոսելու ձևն է:
– Իսկ ո՞վ էր ժողովն անում:
– Ճիշտն ասած, բոլորին չեմ ճանաչում: Համենայնդեպս կոպիտ չէր, ինձ թվում է:
– Դե ձեզ ասում է՝ «մազերդ տենց սիրուն ներկել ես, զուգվել–զարդարվել ես, գիտես պտի էսօր մեծարման երեկո՞ անենք»: Սա վիրավորական չէ՞:
– Դե հիմա, ամեն մարդ մի ձև ունի: Մենակ ինձ չեն ասել, այնպես որ ես կոպիտ չհամարեցի:
– Ճի՞շտ է, որ Արտակ Սարգսյանի եղբայրն էր ժողովը վարողը՝ Արամը:
– Ես չգիտեմ…Ես իրենց հետ ոչ մի կապ չունեմ, համ էլ ինքը աշխատողների հետ շատ լավ է վարվում:
– Իսկ ինչո՞ւ չեք աշխատում:
– Հիմա չեմ ուզում աշխատել, չեմ աշխատում:
– Զուգադիպությո՞ւն է այդ ժողովը և ձեր աշխատանքից դուրս գալը:
– Ի՞նչ կապ ունի ժողովը, ժողով է, ամեն մեկն էլ մի ժողովում ինչ-որ մի բան ասում է: Բոլորն էլ արել են ժողով:
Հիշեցնենք, որ դատախազությունն ուսումնասիրում է այդ ձայնագրությունները:
