Տպել
Ֆրանսիացի հետազոտողները հայտնում են, որ իրենց հաջողվել է լաբորատոր պայմաններում առնետի և մարդու սպերմատոզոիդներ աճեցնել:
Մեթոդը փորձարկել են առնետների վրա` երիտասարդ կենդանիների ամորձիների հյուսվածք վերցնելով և դրանից սպերմատոզոիդներ աճեցնելով, իսկ դրանից հետո ստուգել են այդ մեթոդների արդյունավետությունը մարդկային հյուսվածքների վրա:
Նրանք ամորձիների ուղիները տեղավորել են հիտոզանային գլանների մեջ, նման «փաթեթավորումը» չի խանգարել գազափոխանակմանը և նույնիսկ հյուսվածքները պաշտպանել է բակտերիաներից: Հետագա աճեցումը տեղի է ունեցել Պետրիի գավաթում` սնուցող միջավայրով. հասունացումը շարունակվել է 72 օրվա ընթացքում, իսկ հետո հիտոզանային գլանները տարրալուծվել են` սպերմատոզոիդներ արտազատելով: Ամորձիների ուղիներում գտնվող հասունացող բջիջները փոխազդել են Սերտոլիի բջիջների հետ, որոնց առկայությունն անհրաժեշտ էր սպերմատոզոիդների աճի և զարգացման համար:
Հետազոտության հեղինակներն հավաստիացնում են, որ արհեստական և իսկական սպերմատոզոիդները նմանատիպ հատկանիշներ ունեն: Դա ապացուցելու համար նրանք նախատեսել են մոտ ժամանակներս ստուգել, թե սպերմատոզոիդներն ի վիճակի են արդյոք ձվաբջիջ բեղմնավորել:
