Տպել
ԲՀԿ խմբակցության պատգամավոր «Յուվենցի Կարոյի»՝ Կարո Կարապետյանի փեսան՝ Գոռ Առաքելյանը քիչ առաջ ազատ է արձակվել: «Վերնիսաժի» գործով 6 տարի 6 ամիս դատապարտված Գոռ Առաքելյանին դիմավորելու համար «Նուբարաշեն» ՔԿՀ էին եկել բազմաթիվ պաշտոնյաններ, քրեական հեղինակություններ, անգամ աստղեր: Մեր աղբյուրը, օրինակ, նկատել է երգիչ Թաթային, ով անձամբ էր եկել բերդ սպիտակ մեքենայով՝ Գոռ Առաքելյանին ազատության մեջ դիմավորելու համար: Մեզ առայժմ չի հաջողվել փաստաբանից եւ ՔԿՀ-ից մեկնաբանություն ստանալ եւ պարզել, թե ինչ հիմքով է Գոռ Առաքելյանը ազատ արձակվել: Չհաջողվեց մեկնաբանություն ստանալ նրա պատգամավոր աներոջից, հեռախոսին պատասխանեց օգնականը, ով ոչնչից տեղյակ չէր, համենայն դեպս այդպես ասաց: Ավելի ուշ մեր աղբյուրներից տեղեկացանք, որ Գոռ Առաքելյանը ազատվել է նախագահի ներման շնորհիվ, պայմանական վաղաժամկետ ազատվելու համար նրա ժամկետը չէր լրացել: Հավանաբար այդպես կոմպենսացրել են Կարո Կարապետյանի այս անգամ ԱԺ չգնալը:
Հիշեցնենք, որ 2014 թվականի մայիսի 17-ին «Վերնիսաժի» տարածքում կրակոցներ էին հնչել: Գոռ Առաքելյանը Վարդանանց փողոցի թիվ 18/2 շենքի ստորգետնյա ավտոկայանատեղիի մուտքի դարպասների մոտ վիճել էր Վալերիկ Հովհաննիսյանի և Ներսես Մելքոնյանի հետ, վիճաբանությունն այնքան էր թեժացել, որ Գոռ Առաքելյանն անկանոն կրակահերթ էր բացել վերոհիշյալների ուղղությամբ: Գործով մեղադրյալ Գոռ Առաքելյանի համար դատախազը պահաջել է 9 տարվա ազատազրկում, Նելսոն Մելքոնյանի համար 2, իսկ Վալերիկ Հովհաննիսյանի համար 2.5 տարվա ազատազրկում: Սակայն դատարանը վճռեց Գոռ Առաքելյանին դատապարտել 6 տարի 6 ամսվա ազատարկման, Վալերիկ Հովհաննիսյանին 3 տարվա ազատազրկման, իսկ Ներսես Մելքոնյանին՝ 2 տարվա ազատազրկման:
