Տպել
2016 թ. դեկտեմբերի 15-ին 84 կողմ, 4 դեմ և 1 ձեռնպահ ձայների հարաբերակցությամբ խորհրդարանն ընդունեց «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» և կից ներկայացված օրինագծերի փաթեթը:
Այս տարվա հունվարից արդեն ստեղծվեց զինծառայողների ապահովագրության հիմնադրամը և սկսեց գործել «1000 դրամների» համակարգը:
Մարտի 21-ին առաջին անգամ հիմնադրամի գործառույթը կիրառվեց: Առաջին երկու փոխհատուցումները կատարվել են ժամկետային պարտադիր շարքային զինծառայողներ Գոռ Համազասպի Գարեգինյանի և Անդրանիկ Սմբատի Մուսիկյանի ընտանիքներին: 19-ամյա Գոռ Գարեգինյանը և Անդրանիկ Մուսիկյանը ժամկետային ծառայությունն իրականացնում էին Արցախում: Գեղարքունիքի մարզի Գեղհովիտ համայնքի բնակիչ Անդրանիկը զոհվեց հունվարի 18-ին, Գոռը Շիրակի մարզի Շիրակ գյուղից էր։ Նա զոհվեց փետրվարի 6-ին:
Այսօր տեղեկացանք, որ փոխհատուցում է կատարվել նաև մարտի 28-ին ՊԲ արևելյան ուղղությամբ տեղակայված զորամասերից մեկի պահպանության տեղամասում, հակառակորդի կողմից արձակված կրակոցից մահացու վիրավորում ստացած 20-ամյա Արտակ Էդիկի Ռաֆայելյանի ընտանիքին: «4, 5 օր առաջ 10 միլիոն դրամ է փոխանցվել»,- մեր զրույցում ասաց զոհված զինծառայողի բարեկամներից՝ Մելիք Մկրտչյանը:
Արտակ Ռաֆայելյանը Կոտայքի մարզի Հրազդան քաղաքի բնակիչ էր, ընտանիքի ավագ որդին: Զոհված զինծառայողն անապահով ընտանիքից է: 20-ամյա Արտակը «Գինեսի» գրքի ռեկորդակիր էր. նա 7 ժամ անընդմեջ 11.000 անգամ հենում-ծալում վարժություն է արել և գրանցվել «Հայկական դյուցազնագրքում» և դարձել «Գինեսի» գրքի ռեկորդակիր:
Մայիսի 3-ին հատուցումներ են տրվել նաև 4 զինծառայողի ընտանիքների: Կրտսեր սերժանտ Կարեն Մարատի Ուլուբաբյանի, պայմանագրային զինծառայող սերժանտ Արայիկ Իգորի Սարգսյանի, սպայական կազմի մայոր Նվեր Յուրիկի Բաբաջանյանի և փոխգնդապետ Գեղամ Հենրիկի Մանուկյանի ընտանիքներին կփոխանցվի միանվագ 10-ական միլիոն ՀՀ դրամ:
Պայմանագրային զինծառայող 22-ամյա Կարեն Ուլուբաբյանը զոհվել է 2017 թվականի հունվարի 23-ին՝ հակառակորդի արձակած կրակոցից: 22-ամյա Կարենը սոցիալապես անապահով ու բազմազավակ ընտանիքից էր:
Սերժանտ Արայիկ Սարգսյանը զոհվել է հունվարի 23-ին:
Մայոր Նվեր Բաբաջանյանը զոհվել է մարտի 1-ին՝ հակառակորդի կողմից ձեռնարկված արկակոծության հետևանքով: Նա Արցախի Հանրապետության Մարտունու շրջանի Մարտունի քաղաքից էր:
38-ամյա փոխգնդապետ Գեղամ Մանուկյանը զոհվել է փետրվարի 8-ին՝ ՊԲ հյուսիսային ուղղությամբ տեղակայված զորամասերից մեկի պահպանության տեղամասում, հակառակորդի կողմից հրադադարի ռեժիմի խախտման արդյունքում:
Լուսանկարում`Արտակ Ռաֆայելյանը
