Տպել
10:00-ից Հաղթանակի օրվա կապակցությամբ ՀՀ ԱԻ նախարարությունը մայրաքաղաքում և մարզկենտրոններում կանցկացնի հրշեջ-փրկարարների «Մայիսի 911» խորագրով տոնական շքերթ, որի ընթացքում փրկարարները «Իսուզու» հրշեջ մեքենաներով կշրջեն քաղաքների փողոցներով և կշնորհավորեն մեր համաքաղաքացիներին: Երթուղին՝ Իսակովի պողոտա, Մաշտոցի պողոտա, Կորյունի, Խանջյան, Ագաթանգեղոսի և Գրիգոր Լուսավորչի փողոցներ: Աբովյան փողոց, Հանրապետության հրապարակ, Նալբանդյան, Սայաթ-Նովայի փողոցներ, Մաշտոցի պողոտա, Կորյունի և Հերացու փողոցներ:
Ժամը 10:00-ից մինչև երեկո Կարապի լճին հարակից տարածքում տոնական համերգային ծրագրով հանդես կգա ՀՀ ԱԻՆ փողային նվագախումբը:
Ժամը 13:00-ին «Մայիսի 911» տոնական շքերթի մասնակից հրշեջ մեքենաները կհավաքվեն Հանրապետության հրապարակում, որտեղ նրանց կմիանա ՀՀ ԱԻՆ փողային նվագախումբը, իսկ նախարարության աշխատակիցները փուչիկներ բաց կթողնեն խաղաղություն խորհրդանշող կապույտ երկինք:
11:00-ին Ազատության հրապարակում Հայրենական մեծ պատերազմում և Շուշիում տարած հաղթանակների կապակցությամբ ՀՀ սպորտի և երիտասարդության հարցերի նախարարությունը 2017 թվականի մայիսի 9-ին կազմակերպում է տոնական մարզական միջոցառումներ՝ դրոշներով հեծանվավազք և տարբեր մարզաձևերից ցուցադրական ելույթներ:
Ցուցադրական ելույթներն անցկացվելու են Ալ. Սպենդիարյանի անվան օպերայի և բալետի ազգային ակադեմիական թատրոնի հարակից հրապարակում (Ազատության հրապարակ) և Հյուսիսային պողոտայում՝ ժամը 11.00-12.00-ը:
Հեծանվավազքի մեկնարկը տրվելու է Ազատության հրապարակից ժամը 11.00-ին հետևյալ երթուղով՝ Ազատության հրապարակ, Մաշտոցի պողոտա, Ամիրյան փողոց, Հանրապետության հրապարակով պտույտ երեք անգամ, Նալբանդյան փողոց, Սայաթ-Նովայի պողոտա, Ազատության հրապարակ:
13:30-ին Ազատության հրապարակում կմեկնարկի «Անմահ գունդ» քայլերթը: Ակցիան անցկացվում է Հայաստանի Երիտասարդական հիմնադրամի աջակցությամբ:
Ակցիային կմասնակցեն Հայրենական Մեծ պատերազմի վետերաններ, ՀՀ Պաշտպանության նախարարության և ՀՀ-ում ԱՊՀ երկրների դիվանագիտական ներկայացուցիչներ, հայ Առաքելական եկեղեցու ներկայացուցիչներ, ՀՀ Երկրապահ կամավորական միությունը, Հայաստանի երիտասարդական կառավարությունը, ուսանողներ և աշակերտներ Հայաստանից և Արցախից:
Ակցիան կմեկնարկի Ազատության հրապարակից ժամը 13:30-ին, որից հետո քայլերթը կանցնի Մաշտոցի պողոտայով, Գրիգոր Լուսավորիչ փողոցով դեպի Մանկական զբոսայգի:
14:00-ին «Արամ Խաչատրյան» համերգասրահում կկայանա «Երգող Հայաստան» մանկապատանեկան երգչախմբերի 9-րդ հանրապետական մրցույթի մրցանակաբաշխության արարողությունը և գալա համերգը: Մրցույթը մեկնարկել է մարտի 25-ին և իրականացվում է ՀՀ մշակույթի նախարարության աջակցությամբ: Մրցույթի կազմակերպիչներն են Հայաստանի երաժշտական ընկերությունը, «Հայ փոքրիկ երգիչներ» միջազգային ասոցիացիան, Երևանի քաղաքապետարանը:
17:00-ին Առաջնորդանիստ Ս.Սարգիս եկեղեցում Արարատյան Հայրապետական թեմի երիտասարդաց միությունների նախաձեռնությամբ կկատարվի «Հաղթանակի աղոթք»: Արարողությանը մասնակցելու են զինվորականներ, ռազմական բուհերում սովորող կուրսանտներ, երիտասարդներ: Թեմի երիտասարդները երիտասարդական կառույցների համակարգող Տ.Պետրոս ավագ քահանա Մալյանի գլխավորությամբ ամեն տարի Հաղթանակի և խաղաղության տոնի առթիվ նախաձեռնում են այս ընդհանրական աղոթքը:
