«Ընդդեմ կանանց նկատմամբ բռնության կոալիցիան» խստորեն դատապարտում է

«Ընդդեմ կանանց նկատմամբ բռնության կոալիցիան» խստորեն դատապարտում  է  Երևանի քաղաքապետի կին թեկնածուի և նրա դստեր հանդեպ բիրտ ուժի կիրառման փաստը.

Մայիսի 14-ին՝ Երևանի ավագանու ընտրությունների օրը, ՀՀԿ շտաբում  տեղի է ունեցել բռնություն, բիրտ ուժի ապօրինի և անթույլատրելի կիրառում՝   «Երկիր Ծիրանի» կուսակցության քաղաքապետի թեկնածու, ՀՀ ԱԺ պատգամավոր Զարուհի Փոստանջյանի և նրա դստեր՝ Լիլիթ Դրամփյանի նկատմամբ, որի արդյունքում Փոստանջյանի դուստրը տեղափոխվել է Հանրապետական հիվանդանոց՝ ուղեղի ցնցում ախտորոշմամբ:

Զարուհի Փոստանջյանը Երևանի քաղաքապետի ՀՀԿ-ի թեկնածու Տարոն Մարգարյանի Ավան վարչական շրջանի շտաբ էր եկել ընտրակաշառքի ցուցակների առկայության մասին ահազանգի հետքերով, որտեղ էլ տեղի է ունեցել Զարուհու և նրա դստեր նկատմամբ բռնություն, նախ՝  ՀՀԿ ներկայացուցիչների, այնուհետև՝ ոստիկանների կողմից։ Ոստիկանության ներկայացուցիչները «Երկիր Ծիրանի» կուսակցության թեկնածուին և նրա դստերը հրելով, քարշ տալով դուրս են բերել ՀՀԿ շտաբից, իսկ այնուհետև կարճ ժամանակով բերման ենթարկել Լիլիթ Դրամփյանին:

«Ընդդեմ կանանց նկատմամբ բռնության կոալիցիան» խստորեն դատապարտում է  Երևանի քաղաքապետի կին թեկնածուի և նրա դստեր հանդեպ ուժի կիրառման փաստը, այն համարելով ապօրինի և անընդունելի։
Կոալիցիան կոչ է անում բոլոր իրավապաշտպան կառույցներին հետամուտ լինել դեպքի քննությանը։
Իրավապահ համակարգից պահանջում ենք համակողմանի  քննություն անցկացնել ու պատասխանատվության ենթարկել միջադեպի բոլոր մեղավորներին՝ թե՛ ՀՀԿ շտաբի, թե՛ ոստիկանության ներկայացուցիչներին։
Նաև` հայտարարում ենք, որ պետության կողմից անբավարար միջոցառումների և  նման բռնության կիրառման փաստի անտեսման պարագայում, որը  հակասում է Հայաստանի կողմից վավերացված մի շարք կոնվենցիաներին, այդ թվում ՄԱԿ-ի «Կանանց նկատմամբ խտրականության բոլոր ձևերի վերացման մասին կոնվենցիային» (CEDAW), մենք  հետամուտ ենք լինելու բոլոր միջազգային հարթակներում բարձրաձայնելու և ի ցույց դնելու այս միջադեպը, որպես պետության պարտավորությունների կատարման թերացում և կանանց քաղաքական մասնակցության հնարավորությունների սահմանափակման ու խոչընդոտման վառ օրինակ։

«Ընդդեմ կանանց նկատմամբ բռնության կոալիցիա»

15․05․2017

Անդամ կազմակերպություններ

Women’s Resource Center/Կանանց ռեսուրսային կենտրոն

Society Without Violence/Հասարակություն առանց բռնության

Women’s Rights Center/Կանանց իրավունքների կենտրոն

Women’s Support Center/Կանանց աջակցման կենտրոն

Public Information and Need of Knowledge/Հանրային տեղեկատվություն և գիտելիքի կարիք

Sexual Assault Crisis Center/Սեռական բռնության ճգնաժամային կենտրոն

Real World, Real People/ Իրական աշխարհ, իրական մարդիկ