«Չափավոր արևայրուքը հա՛մ գեղեցիկ է, հա՛մ առողջարար, բայց այն չի կարելի չարաշահել». խորհուրդներ մաշկաբանից

Մաշկաբան Էմիլ Միրզոյանը, խոսելով շոգ եղանակին մաշկի հետ կապված խնդիրների մասին, նշեց, որ մաշկի համար ամենալավ պաշտպանվածությունը կարող են ապահովել լավ որակի արևապաշտպան քսուքները: Նրա խոսքով՝ դրանք պետք է լինեն 50 SPF և ավելի պաշտպանվածության աստիճանի, քանի որ միայն այդ աստիճանի SPF-ներն են, որ ապահովում են մաշկի համար լավ պաշտպանություն արևից:

Մաշկաբանի դիտարկմամբ՝ շատ կարևոր է քսուքների ճիշտ օգտագործումը.

«Շատ դեպքերում մարդիկ հենց ծովափում են քսում քսուքները ու հետո բողոքում, որ չի օգնում: Բայց այդ քսուքները սկսում են աշխատել քսելուց 30 րոպե անց: Հետևաբար՝ պետք է այն քսել տանից դուրս գալուց կես ժամ առաջ: Բացի դա էլ՝ եթե արևի տակ երկար եք մնում, 2 ժամը մեկ պետք է թարմացնեք արևապաշտպան քսուքը»:

Եթե, այնուամենայնիվ, արևայրուք կա, ապա Էմիլ Միրզոյանը նշեց, որ պետք է օգտագործել pantenol պարունակող կրեմներ:

«Ամեն դեպքում ամեն ինչ չափի մեջ է գեղեցիկ: Չափավոր արևայրուքը հա՛մ գեղեցիկ է, հա՛մ առողջարար, բայց այն չի կարելի չարաշահել: Մանավորապես՝ չի կարելի արևայրուք ընդունել ժամը 12:00-14:00-ն ընկած ժամանակահատվածում, քանի որ այդ ժամանակ արևի ուղիղ ճառագայթում է տեղի ունենում»,- նշեց մասնագետը:

Մաշկաբանը խորհուրդ տվեց հագնել ավելի թեթև, բաց գույնի հագուստ, որպեսզի արևի ճառագայթներն անդրադարձնի ավելի շատ:

Անի Թորոսյան