Տպել
Դեմքի մաշկի խնամքը կարևոր է տարվա յուրաքանչյուր սեզոնին, բայց հատկապես աշնանը կարիք է զգացվում լրացուցիչ խնամքի, որպեսզի մաշկը ձերբազատվի ամռան ընթացքում կրած վնասներից:
City Spa կենտրոնի էսթետիկ բժիշկ Աննա Արզումանյանը Doctors.am-ի հետ զրույցում ներկայացրեց պիլինգի մի քանի տեսակ, որոնք կօգնեն ազատվել վնասված մաշկից:
Ինչո՞ւ է աշնանն այդքան անհրաժեշտ պիլինգը:
Այն, ինչ արևը, կեղտոտ օդը կամ սխալ սննդակարգը, քրոնիկ բորբոքումները հասցրել են մաշկին, պետք է վերականգնել հիմնականում աշնանը և ձմռանը: Գոյություն ունի մեխանիկական պիլինգ, երբ սկրաբով են հանում վնասված մաշկը: Նախընտրելի է, որ այն լինի մանր, որպեսզի չվնասի մաշկը: Ի դեպ, այն ինքնուրույն էլ կարելի է պատրաստել: Օրինակ՝ սուրճը աղալ խոշոր հատիկների, խառնել ձիթապտղի ձեթի հետ և մերսելով քսել մաշկին: Նմանատիպ սկրաբ կարելի է պատրաստել նաև ծովի աղը խառնելով ձիթապտղի ձեթի հետ: Կա նաև ֆերմենտատիվ (էնզիմային) պիլինգ, օրինակ լոռամրգով (клюква) կամ նռան հատիկներով: Նույնպես պետք է մերսելով քսել դեմքին, պահել 20 րոպե և լվանալ:
Քիմիկական պիլինգներն ավելի լուրջ են: Պրոցեդուրան արվում է տարբեր տոկոսայնությամբ թթուներով, որոնք քայքայում են մաշկի չորացած և վնասված շերտերը, որոնք երեք օրվա ընթացքում շերտազատվում և դուրս են գալիս: Մաշկը դառնում է ավելի թարմ, առողջ, առանց պիգմենտների:
Քիմիական պիլինգներից առանձնանում է, այսպես կոչված, դեղին պիլինգը, որն ավելի կանխատեսելի է: Այս պիլինգի ժամանակ արդյունքը հստակ է, իսկ մյուս թթուների դեպքում դու երբեք չես կարող իմանալ, թե այն որքան կխորանա, հետևաբար՝ պացիենտին միշտ պետք է զգուշացնել, որ հնարավոր է՝ դեմքը մի քիչ կարմրի, տեղ-տեղ վերքեր առաջանան և այլն:
Ե՞րբ է պետք նախապատրաստվել քիմիական պիլինգին:
Իրավունք չունես խորը պիլինգ անել, եթե մաշկը նախապես չես պատրաստել: Ցանկացած լուրջ պիլինգից առաջ առնվազն 1-2 ամիս դու պետք է մաշկի բոլոր ֆունկցիաները վերականգնես, պետք է նշանակվի ճիշտ խնամք, որը կարթնացնի մաշկի բոլոր բջիջները, հակառակ դեպքում՝ արդյունքը դրական չի լինի:
Տարվա ընթացքում քանի՞ անգամ կարելի է քիմիական պիլինգ անել:
Քիմիական պիլինգ կարելի է անել տարին երկու անգամ՝ աշնանը և ձմռանը, բայց եթե խոսքը գնում է հաստ պիգմենտի, ատրոֆիկ սպիների մասին, մեկ պիլինգը ոչինչ չի տա:
Պիլինգից հետո ինչպե՞ս է պետք խնամել մաշկը:
Պարտաճանաչ կերպով պետք է արևապաշտպան քսուք օգտագործել և հետևել բժշկի մյուս ցուցումներին: Ես միշտ ասում եմ, որ Հայաստանը բարձր սարերի գոտում է գտնվում, պետք է ամառ-ձմեռ քսել արևապաշտպան քսուքներ և հետո միայն տանից դուրս զգալ:
Ի՞նչ հակացուցումներ կան:
Եթե հիվանդը գիտի, որ այս կամ այն թթվից ալերգիա ունի, բնականաբար, քիմիական պիլինգը նրան հակացուցված է: Ցանկալի չէ նաև քիմիական պիլինգ անել հղի կանանց և կերակրող մայրերին:
Որքա՞ն արժե պիլինգը Հայաստանում:
Դեմքի մաշկի պիլինգի գները տատանվում են 10 հազարից մինչև 50 հազար դրամ:
