Տպել
Սինգապուրցի գիտնականները մոնիտորինգի ինտեգրված համակարգ են մշակել, որը հեշտությամբ կարելի է կցել դիմակին` COVID-19-ի ախտանիշների մոնիտորինգի համար, գրում է Strait Times-ը:
Ներկառուցված սենսորները չափում են մարմնի ջերմաստիճանը, արյան թթվածնի հագեցվածությունը, արյան ճնշումը և սրտի ռիթմը:
Հետազոտության համահեղինակներից մեկի` պրոֆեսոր Լո Սյան Յունի խոսքով` նրանք տեսել են, որ կորոնավիրուսով հիվանդների մեկուսացման ժամանակ առաջնագծում գտնվող բժիշկները ստիպված են ամեն կես ժամը մեկ ստուգել վարակվածի կենսական ցուցանիշները:
Ըստ նրա` այս ընթացքում հիվանդանոցներում վարակվման դեպքերի մասին հաղորդումներ են ստացվել, և գիտնականները որոշել են օգնել առաջնագծում գտնվող բժիշկներին` վարակման վտանգից հնարավորինս խուսափելու համար: Բացի այդ, վարակված հիվանդների կենսական նշանակության ցուցանիշները չափելու համար բժիշկները ստիպված են մի բաժանմունքից մյուսը ծանր սարքավորումներ տեղափոխել:
Այսպիսով, նման «խելացի» դիմակները կարող են տրվել COVID-19-ով վարակված հիվանդներին` կենսական նշանակության ցուցանիշները գրանցելու համար` առանց բժիշկներին և բուժքույրերին ավելորդ ռիսկի ենթարկելու:
Պրոֆեսորի խոսքով` ներկայումս փորձարկվում է համակարգի վերջին տարբերակը, որը երեք սենսոր է ներառում մեկ չիպի մեջ:
Բացի այդ, համակարգը հագեցած էր Bluetooth սարքով, որը սմարթֆոնին առողջության վերաբերյալ տվյալների փոխանցում թույլ կտա իրական ժամանակում:
