Տպել
Ձեռքերի եւ եղունգների տեսքը կարող է վկայել մի շարք հիվանդությունների մասին, կարծում է թերապեւտ Տուվա Ամութանը (Մեծ Բրիտանիա):
Ըստ նրա` օրինակ, մանուշակագույն կետերի, ելունդների կամ բծերի առկայությունը ձեռքերի վրա կարող է ինֆեկցիոն էնդոկարդիտ նշանակել, որի դեպքում սրտի ներքին թաղանթը բորբոքվում է: Այդպիսի նորագոյացություններն Օսլերի հանգույցներ են կոչվում եւ կարող են բակտերիալ էնդոկարդիտի մաշկային հազվագյուտ ախտանիշ լինել:
Եղունգների վրա մուգ շագանակագույն բծերը կարող են մելանոմայի` մաշկի չարորակ ուռուցքի նշան լինել: Դրանք կարող են նաեւ վկայել գայլախտ կամ ՄԻԱՎ-ի մասին: Սակայն որոշ դեպքերում նման բծեր կարող են հայտնվել որոշակի դեղամիջոցներ ընդունելու պատճառով եւ ամբողջովին անվնաս լինել:
Իր հերթին, մատների գունատ եւ թմրած ծայրերը կարող են վկայել Ռայնոյի սինդրոմի առկայության մասին, որը բնութագրվում է վերջույթների անոթներում զարկերակային համակարգի խանգարմամբ ցրտի կամ էմոցիոնալ հուզմունքի ազդեցության տակ:
«Երբեմն ախտանիշները կարող են առաջանալ ինքնաբերաբար, եւ մենք հստակ չգիտենք, թե ինչու է դա պատահում»,- խոստովանել է Ամութանը:
Եղունգների հատվածում մատների հաստացումը կարող է վկայել թոքերի քաղցկեղի կամ թոքերի այլ քրոնիկ հիվանդությունների մասին, ինչպիսիք են բրոնխոէկտազը, աբցեսները, էմֆիզեման եւ մուկովիսցիդոզը:
Ուռած ձեռքերն աղիքային բորբոքման ախտանիշներից մեկն են: Աղիքային խնդիրներ ունեցող մարդկանց մոտ կարող են ձեռքերի եւ ոտքերի հոդերի ուռուցք եւ ցավեր առաջանալ:
news.am
