Դուք կարող եք 60 տոկոսին պատվաստել, ու ոչ մի բան չփոխվի, որովհետև այն 20 տոկոսը, որն իրականում ռիսկի տակ էր, չի պատվաստվի, ու մահացությունը կմնա նույն մակարդակի վրա. համաճարակաբան

«Չեմ կարծում, որ որևէ բան կփոխվի: Պատժամիջոց է, ով չի ենթարկվել առաջինին՝ կարող է երկրորդին ենթարկվի: Էական փոփոխություն, չեմ կարծում, որ կլինի: Այո, պատվաստվողների թիվը մի քիչ կարող է ավելանալ, քանի որ գուցե այն գումարը, որ պատրաստ էին վճարել 14 օրում, 7 օրում չկարողանան վճարել, սակայն որակապես համաճարակի վրա ազդեցությունը չի լինի»,- 168.am-ի հետ զրույցում խոսելով ՀՀ առողջապահության նախարարի` դեկտեմբերի 1-ից ՊՇՌ թեստերի տրամադրման ժամկետները 14-ից մինչև 7 օր կրճատելու որոշման մասին՝ ասաց համաճարակաբան Էդուարդ Հովհաննիսյանը:

Հարցին, այդ դեպքում ի՞նչ պետք է անել, եթե վարակվածների թիվն ու մահվան դեպքերը շատանում են, նա պատասխանեց.

«Նպատակային պատվաստումը: Պետք է պատվաստվեն ռիսկի խմբերում գտնվող ու տարիքով մարդիկ, ոչ թե աշխատող մարդիկ: Դուք կարող եք 60 տոկոսին պատվաստել, ու ոչ մի բան չփոխվի, որովհետև այն 20 տոկոսը, որն իրականում ռիսկի տակ էր, չի պատվաստվի, ու մահացությունը կմնա նույն մակարդակի վրա»:

Հավելենք, որ ավելի վաղ Առողջապահության նախարարի մամուլի խոսնակ Հռիփսիմե Խաչատրյանը մեզ հետ զրույցում հայտնել էր. «Աշխատող այն քաղաքացիները, որոնք չեն ցանկանում պատվաստվել՝ 14 օրվա փոխարեն՝ 7 օրը մեկ ՊՇՌ թեստ պետք է ներկայացնեն գործատուին: Դեկտեմբերի 1-ից որոշումն ուժի մեջ կմտնի»:

Նրա խոսքով՝ մուտքի համար կպահանջվի պատվաստման QR կոդ կամ ՊՇՌ թեստի բացասական արդյունքը։

Առողջապահության նախարարությունից ավելի վաղ հայտնել էին, որ  դեկտեմբերի 1-ից սահմանափակումների փաթեթ են ներկայացնելու, որոնցից մեկով էլ մուտքը հանրային վայրեր՝ լինի «Հայփոստ», մարզասրահ, կինոթատրոն, լինելու է QR կոդով կամ ՊՇՌ հետազոտության բացասական արդյունքով:

Հավելենք, որ նոյեմբերի 4-ին կառավարության ճեպազրույցների սրահում առողջապահության նախարար Անահիտ Ավանեսյանն ասել էր.

«Մենք առաջարկելու ենք, որ դեկտեմբերի 1-ից աշխատատեղերում ներկայացվող ՊՇՌ բացասական թեստերի պատասխանի համար 14-օրյա ժամկետը փոփոխվի 7-օրյայի, իսկ դեկտեմբերի 15-ից մշակութային հաստատություններ ու ռեստորաններ այցելելու համար ունենալ պատվաստումը հաստատող QR կոդ կամ վկայական»: Նա նշել էր, որ նախարարությունն արդեն այսօր հրամանի փոփոխության նախագիծ է շրջանառելու:

Ավանեսյանի խոսքով՝ կան նաև այլ առաջարկներ, որոնք կքննարկվեն միջգերատեսչական հանձնաժողովի կողմից:

Անի Կարապետյան