Տպել
Այսպես կոչված հետքովիդային համախտանիշ ունեցող որոշ պացիենտներ տառապում են թոքերի պաթոլոգիայով։ Ընդ որում՝ այդպիսի խնդիրներ կարող են ունենալ այն մարդիկ, ովքեր հաղթահարել են ինչպես թեթեւ, այնպես էլ ծանր ձեւերի COVID-19-ը։ Այս մասին նախազգուշացնում են բրիտանացի բժիշկները։
Ինչպես գրում է The Guardian-ը, որոշ պացիենտների մոտ COVID-19-ից հետո դժվարացել է արյամբ գազերի անցանելիությունը։ Փոփոխություններն օրգանիզմում դժվարացնում են թթվածնի մատակարարումն արյանը։
Այս պաթոլոգիան պարզելու գործում բժիշկներին օգնել է մագնիսառեզոնանսային տոմոգրաֆիան։ Կամավորներին փորձի ժամանակ խնդրել են շնչել թթվածնի եւ քսենոնի խառնուրդ, քանի որ հատուկ նախապատրաստումից հետո այդ գազը կարելի է տարբերել տոմոգրաֆում եւ հետեւել օրգանների աշխատանքին։
«Սա իսկապես ենթադրում է, որ վիրուսը առաջ է բերում ինչ-որ կայուն անոմալիաներ թոքերի միկրոկառուցվածքում կամ թոքերի անոթային ցանցում»,- նշել է հետազոտության համահեղինակ Էմիլի Ֆրեյզերը։
Գիտնականները ծրագրում են պարզել, թե որքան հաճախ են հանդիպում հայտնաբերված պաթոլոգիաները, ինչով են դրանք պայմանավորված եւ ինչ երկարաժամկետ հետեւանքներ կարող են ունենալ։
