Տպել
Էդիթ Քոուենի համալսարանի կողմից անցկացված նոր հետազոտությունը թույլ է տվել կարեւոր բացահայտում անել, որը կարող է ասթմայով 262 միլիոն մարդկանց ավելի արդյունավետ բուժման հանգեցնել:
Հետազոտության արդյունքները հրապարակվել են European Respiratory Journal-ում։
Հետազոտությունը ցույց է տվել, որ հիվանդության ծանր ընթացքով ասթմատիկների մեզի մեջ արտադրվում է հատուկ կենսաքիմիական պրոֆիլ (մետաբոլիտներ)՝ համեմատած թեթեւ եւ միջին աստիճանի ծանրության ասթմատիկների եւ առողջ մարդկանց հետ:
Գիտնականները վերլուծել են 11 երկրների ավելի քան 600 մասնակիցների մեզի նմուշները U-BIOPRED հետազոտության շրջանակներում, որը ծանր ասթմայի տարբեր ենթատեսակները բացահայտելու եւ ավելի լավ հասկանալու համաեվրոպական նախաձեռնություն է:
Հետազոտական թիմը պարզել է, որ ծանր ասթմատիկների մոտ ցածր են հատուկ տեսակի մետաբոլիտները, որոնք կոչվում են կարնիտիններ:
Կարնիտինները կարեւոր դեր են խաղում բջջային էներգիայի արտադրության եւ իմունային պատասխանների մեջ:
Հետագա վերլուծությունը ցույց է տվել, որ ծանր ասթմատիկ հիվանդների մոտ կարնիտինի նյութափոխանակությունը ցածր է:
Այս նոր բացահայտումները կօգնեն հետազոտողներին ասթմատիկների բուժման նոր, ավելի արդյունավետ միջոցներ մշակել, կարծում են գիտնականները:
