Գիտնականները բեկում են կատարել մանկական առեղծվածային հեպատիտի ծագման ուսումնասիրության մեջ

Բրիտանացի գիտնականները բեկում են կատարել մանկական առեղծվածային հեպատիտի ծագման ուսումնասիրության մեջ, գրում է Medical Xpress-ը։

Առողջապահության համաշխարհային կազմակերպությունն անցյալ տարվա հոկտեմբերից հայտնել է հիվանդության առնվազն 1010 հավանական դեպքի մասին , այդ թվում՝ 46 փոխպատվաստում պահանջող դեպք եւ 22 մահ։

Նախորդ տեսությունները ենթադրում էին, որ այս դեպքերի հետեւում կանգնած է սովորական ադենովիրուսային վարակների աճը:

Սակայն Շոտլանդիայում եւ Լոնդոնում անկախ անցկացված երկու նոր ուսումնասիրություններում գիտնականները պարզել են, որ մեկ այլ վիրուս՝ AAV2 (ադենո ասոցացված վիրուս 2), որն առկա է բոլոր հետազոտված հիվանդների 96 տոկոսի մոտ, կարեւոր դեր է խաղացել:

Երկու խմբերն էլ եզրակացրել են, որ համակցված վարակը, կամ AAV2-ը եւ ադենովիրուսը, կամ երբեմն հերպեսի վիրուսը՝ HHV6, լավագույնս բացատրում են լյարդի ծանր հիվանդությունը:

Դեռ պարզ չէ, թե ինչու են հեպատիտի դեպքերն աճել վերջին ժամանակներում, բայց երկու խմբերն էլ ընդգծել են  այն հնարավորությունը, որ փակ տարածքները կարող են նպաստել դրան։