Տպել
Հնագետները բազմաթիվ առեղծվածային «ուրվական հետքեր» են հայտնաբերել Յուտայի Մեծ Սոլթ Լեյք անապատում, հայտնում է Քորնելի համալսարանի մամուլի ծառայությունը։
Գիտնականների խոսքով՝ հետքերը տեսանելի են միայն անձրևից հետո, դրանք լցվում են խոնավությամբ և մգանում։ Չորանալուց հետո նորից անհետանում են։
Ի սկզբանե թիմն այս տարվա հուլիսին ընդամենը մի քանի հետք է հայտնաբերել։ Շրջակա տարածքի մանրակրկիտ ստուգումից հետո հայտնաբերվել է առնվազն 88 ոտնահետք, որոնք պատկանել են մեծահասակներին և մինչև 5 տարեկան երեխաներին:
«Ուրվական հետքերը» գոյացել են առնվազն 10 000 տարի առաջ, երբ տարածքը հսկայական խոնավ տարածք էր: Այնուամենայնիվ, հետազոտողները կասկածում են, որ ոտնահետքերը կարող էին թողնվել 12 000 տարի առաջ՝ վերջին սառցե դարաշրջանում։
«Մարդիկ կարծես քայլել են ծանծաղ ջրով, և ավազը արագ ծածկել է նրանց ոտնահետքերը: Բայց ավազի տակ ցեխի շերտ է եղել, որը լցոնվելուց հետո հետքերը անձեռնմխելի են պահել», – ասել է առաջատար հետազոտող Դարոն Դյուկը՝ Ֆարարևմտյան մարդաբանական հետազոտական խմբի հնագետը:
Գիտնականները նշում են, որ ոտնահետքերի հայտնաբերման վայրից 2 կմ-ից պակաս հեռավորության վրա նախորդ հետազոտող թիմը հայտնաբերել է որսորդների ճամբար, որը թվագրվում է 12 000 տարի առաջվան, որտեղ կարող էին բնակեցվել այն մարդիկ, ովքեր թողել են ոտնահետքերը:
Այժմ հնագետները շարունակում են հետազոտական աշխատանքները, որից հետո հոդվածը կհրապարակվի գրախոսվող գիտական ամսագրերից մեկում։
