Տպել
Ամերիկացի գիտնականները մշակել են դեղամիջոց, որն արդյունավետորեն չեզոքացնում է օմիկրոնի շտամը եւ կորոնավիրուսի շատ տարբերակներ։ Դանա-Ֆարբերի քաղցկեղի ինստիտուտի, Բոստոնի համալսարանի, Մասաչուսեթսի ընդհանուր պրոֆիլի հիվանդանոցի, Կոլորադոյի պետական համալսարանի հետազոտողների աշխատանքի արդյունքները հրապարակվել են Science Advances ամսագրում:
Մշակումը, որը կոչվում է DF-COV-01, խայծ-մոլեկուլ է ACE2 ռեցեպտորի համար: Ի տարբերություն հակամարմինների վրա հիմնված դեղամիջոցների, SARS-CoV-2-ին շատ ավելի դժվար է պայքարել ACE2 խայծի դեմ, քանի որ վիրուսի մուտացիաները, որոնք օգնում են նրան դիմակայել դեղամիջոցին, նաեւ նվազեցնում են բջիջները վարակելու նրա կարողությունը:
Նոր հետազոտությունը բացահայտել է այն առանձնահատկությունները, որոնք ACE2 խայծի հիման վրա ստեղծված դեղամիջոցներն արդյունավետ եւ երկարատեւ են դարձնում:
Փորձերը ցույց են տվել, որ երբ սպիտակուցի որոշակի բեկորն ակտիվանում է, դեղամիջոցն ավելի սերտորեն է ներդրվում վիրուսի մեջ եւ ավելի երկար է գործում օրգանիզմում: Միեւնույն ժամանակ, դեղամիջոցն ինքնին անդառնալի փոփոխություններ է առաջացնում վիրուսի կառուցվածքում՝ նա վնասում է սպիտակուց-փշերը, այնպես որ պաթոգենը կորցնի բջջի մակերեսի ACE2 ռեցեպտորի հետ կապվելու ունակությունը եւ չկարողանա վարակել նրան:
Քանի որ կորոնավիրուսների մեծամասնությամբ վարակվելու համար պահանջվում է հենց ACE2-ի հետ փոխազդեցություն, դեղամիջոցն արդյունավետ է բոլոր առկա եւ նույնիսկ ապագա շտամների համար:
DF-COV-01-ը դեռ չի փորձարկվել մարդկանց վրա, թեեւ դրա մշակումը գրեթե ավարտված է: Ներկայումս իրականացվում են նախակլինիկական հետազոտություններ, որոնք անհրաժեշտ փուլ են կլինիկական փորձարկումների թույլատրման համար։
