Տպել
Google-ն իր որոնողական համակարգում ներդրել է արհեստական բանականության միջոցով պատկերների ստեղծման հնարավորություն: Google Search Generative Experience-ը (SGE) օգտատերերին թույլ է տալիս տեքստի նկարագրության հիման վրա ստեղծել պատկերներ՝ օգտագործելով արհեստական բանականության Imagen մոդելը:
Պատկեր ստեղծելու համար օգտատերը պարզապես պետք է մուտքագրի դրա նկարագրությունը որոնման տողում, և համակարգը կառաջարկի մի քանի տարբերակ, որոնցից կարելի է ընտրել լավագույնը։ Ստեղծված պատկերը կարող է խմբագրվել նաև տեքստային հրամանների միջոցով: Նոր գործառույթն աշխատում է նաև Google-ի պատկերների որոնման բաժնում։
Google-ը հայտարարել է, որ նոր գործառույթը մշակելիս հաշվի է առել արհեստական բանականության օգտագործման էթիկական և իրավական ասպեկտները՝ պատկերներ ստեղծելու համար: Ստեղծված բոլոր պատկերներն ունեն հատուկ պիտակ և ջրանիշ, որը ցույց է տալիս դրանց ծագումը: Համակարգը չի ստեղծում մարդկանց կամ հայտնիների դեմքերի ֆոտոռեալիստական պատկերներ, ինչպես նաև հրաժարվում է ստեղծել պատկերներ, որոնք խախտում են ընկերության քաղաքականությունը:
Գործառույթը ներկայումս հասանելի է միայն թեստային ռեժիմով 18 տարեկանից բարձր օգտատերերի համար, որոնք ակտիվացրել են SGE-ն Google Search Labs բաժնում:
