Տպել
Տղամարդիկ ամուսնությունից հետո ավելի շատ քաշ են հավաքում, քան կանայք: Ամուսնությունը զգալի դրական ազդեցություն ունի տղամարդկանց մարմնի զանգվածի ինդեքսի (BMI) վրա՝ հատկապես ամուսնությունից հետո առաջին հինգ տարիների ընթացքում, ասվում է Economics & Human Biology ամսագրում հրապարակված նոր հետազոտության մեջ:
Չինաստանի Սոցիալական գիտությունների ակադեմիայի հետազոտողները վերլուծել են Չինաստանի առողջության եւ սնուցման հետազոտության տասը փուլերի տվյալները՝ ընդգրկելով 1989-ից մինչեւ 2015 թվականն ընկած ժամանակահատվածը: Նրանք պարզել են, որ ամուսնությամբ է պայմանավորված լինում տղամարդկանց շրջանում ավելորդ քաշի 5,2%-ով աճը եւ 2,5%-ով ճարպակալումը:
Մասնագետները նշել են, որ այս ցատկումը տեղի է ունենում այն պատճառով, որ տղամարդիկ հակված են ավելի շատ ուտել եւ ավելի քիչ մարզվել ամուսնության ընթացքում:
«Տղամարդիկ տարիքի հետ բախվում են ճարպակալման զգալի ռիսկի, ուստի ամուսնությունից հետո կարեւոր է, որ նրանք լուրջ վերաբերվեն իրենց ապրելակերպին՝ պահպանելով առողջ ուտելու սովորույթներ, եւ կանոնավոր մարզվելով»,-գրում է Daily Mail-ը՝ մեջբերելով Չինաստանի Հասարակական գիտությունների ակադեմիայի ներկայացուցիչ Շիվեն Քուանին։
Նախորդ հետազոտությունները ցույց են տվել, որ ամուսնացած մարդիկ հակված են զգալիորեն ավելի բարձր մարմնի զանգվածի ինդեքս ունենալ, քան միայնակները, ինչը նշանակում է, որ որքան ավելի գոհ է մարդն իր ինտիմ հարաբերություններից, այնքան ավելի հավանական է, որ նա գիրանան՝ մի երեւույթ, որը սովորաբար կոչվում է «երջանիկ ճարպ»։
Այնուամենայնիվ, այս արդյունքները կարող են տարբերվել Արեւմուտքի բնակիչների տվյալներից: «Զուգընկեր ընտրելու չափանիշները, ամուսնության նպատակները, հարսանեկան արարողությունների սովորույթները եւ ամուսնությունից հետո կենցաղային պարտականությունների բաշխումը զգալիորեն տարբերվում են արեւմտյան հասարակություններում գերիշխող չափանիշներից: Հետեւաբար, քաշի վրա ամուսնության ազդեցությունը կարող է տարբեր լինել Չինաստանում եւ Արեւմուտքում»,-նշվում է հետազոտության մեջ:
