Գեղեցիկ վարսերը`որպես կանացի գեղեցկության գրավական

Դեռևս հնագույն ժամանակներում աշխարհի շատ ժողովուրդներ մազերին հատուկ նշանակություն էին տալիս: Վարսահարդարմամբ հնարավոր էր որոշել նույնիսկ մարդու հասարակական դիրքը:

Եգիպտոսում, օրինակ, նորաձև էին կեղծամներն ու, այսպես կոչված՝ երկրաչափական սանրվածքները,  Հին Հունաստանում վարսերի հարդարման ձևն ընդգծում էր մարդու մարմնի կառուցվածքը, Հին Հռոմում կանայք ունեին երկար վարսեր, որոնք գանգրացնում և հյուսում էին տարբեր եղանակներով, Ռուսիայում կանայք երկար հյուսքերով էին, իսկ Հին Չինաստանում գերադասում էին վարսահարդարման ավելի բարդ տարբերակներ:

Մեր օրերում վարսերի նորաձևությունը փոփոխվում է անընդհատ` երկարից՝ մինչև չափազանց կարճ, սակայն մի բան անփոփոխ է. գեղեցիկ, փարթամ և առողջ վարսերը զարդարում են կնոջը և ընդգծում գեղեցկությունը:

Կարևոր է հիշել, որ վարսերն ամենօրյա խնամքի կարիք ունեն: Մազերը սիրում են օդ, լույս և առողջ սնունդ: Եթե մարդու օրգանիզմում ինչ-որ բան խաթարված է, առկա է, ասենք, մրսածություն կամ բարձր ջերմություն, ապա մազերը խունանում են, կորցնում փայլը, դառնում կոտրատվող:

Գեղեցիկ և առողջ վարսեր ունենալու համար անհրաժեշտ է

հրաժարվել ալկոհոլից և ծխախոտից

լիարժեք 8-ժամյա քուն

պարբերաբար զբոսնել մաքուր օդում

չափավոր ֆիզիկական ծանրաբեռնվածություն

արյան հոսքը դեպի մազերի սոխուկները տանող գլխի մերսում

մոտ կեսժամանոց եթերայուղային փաթաթաններ, որոնք ամրացնում են մազերը և արագացնում դրանց աճը

A, B, C, E խմբերի վիտամիններով, յուղերով, բույսերի էքստրակտներով հագեցած շամպուններ`ըստ մազերի տիպի

գլուխը լվանալ ոչ շատ տաք ջրով

թաց մազերը չսանրել

հաճախակի փոխել մազերը բացելու գծերը (բախտը), որպեսզի այդ հատվածի մազերը չնոսրանան

շաբաթը մեկ անգամ գործածել համապատասխան դիմակներ:

Եվ չնայած անընդհատ փոփոխվող մազերի խնամքի միջոցների տարատեսակ առկայությանը, միևնույն է, խնամքի տնական միջոցներն իրենց արդյունավետությամբ անգերազանցելի են:

Սնուցող և խոնավեցնող դիմակ

Տաքացրած կեֆիրը քսել մազերին և թողնել 40 րոպե, ապա  սովորականի նման լվանալ շամպունով:

Դիմակ չոր մազերի համար

1 բանանը տրորել՝ մինչև համասեռ զանգված դառնալը, ավելացնել 1 ձվի դեղնուց, 2 ճ/գ ճակնդեղի, հնդյուղի (касторовое масло) կամ նուշի յուղ, լավ խառնել և քսել մազերին: 30-40 րոպե հետո լվանալ շամպունով:

Դիմակ յուղոտ մազերի համար

1 ոչ մեծ թթվաշ խնձորն անցկացնել մանր քերիչով, ավելացնել մի բուռ թթվաշ, լավ տրորած խաղող, 1 ճ/գ թարմ քամած կիտրոնի հյութ: Խառնել, քսել մազերի արմատներին և թողնել 20-25 րոպե, ապա լավ լվանալ գլուխը տաք ջրով:

Մազերի աճը խթանող, փարթամություն և ծավալ հաղորդող դիմակ

1 ճ/գ սննդային ժելատինի փոշին լուծել 3-4 ճ/գ տաք ջրում, թողնել թրմվի 15 րոպե, մինչև ժելատինն ուռչի, ապա ավելացնել 1 թ/գ ձեր մազերի բալզամից: Լավ քսել մազերի ողջ երկայնքին և արմատներին ու գլխին անցկացնելով պոլիէթիլենե տոպրակ ու գլուխը սրբիչով փաթաթելով` ապահովել ջերմոցային էֆեկտ: 20 րոպե անց լվանալ շամպունով և բալզամով: Կրկնել շաբաթական 2 անգամ:

Նյութը հրապարակման պատրաստեց Մարիա Ղուկասյանը