Վահագն Աթաբեկյան․ «Եվ պարզունակ երգ ոչ սովորական առիթների համար»
Advertisement 1000 x 90

Վահագն Աթաբեկյան․ «Եվ պարզունակ երգ ոչ սովորական առիթների համար»

Նույն խեղճ կարոտը նույն խեղճ թեւերիս
Մահապարտի պես
Իմ բոլոր բոլոր մահվան ձեւերից
Ես ընտրեցի քեզ

Արդ թույլ տուր քեզ հետ խոսել սիրելիս
Հանգով հնացած
Եւ ասել որ ես միշտ քեզ հիշելիս
Հիշելու եմ ցավ

Ասել թե մեկը ոչ մեկը գուցե
Իր խաղաղ ու չար
Օրհնախնդությամբ ինձ դառն անիծեց
Լինել գաղթօջախ

Ու անվերջ լսել քայլեր հերթական
Որ համրակսկիծ
Հողն են տրորում մի վերջին անգամ
Ասել է թե ինձ

Մնացյալը սուտ մնացյալը ծուխ
Կարոտ ու լեղի
Կյանք էր նպատակ եւ արդարացում
Ձեր քոչվոր ցեղի

Ու նույն կարոտը նույն խեղճ թեւերիս
Մեղապարտի պես
Իմ բոլոր բոլոր մահվան ձեւերից
Ես ընտրեցի քե՛զ։

hetq.am