Տպել
Սպասք լվալու սպունգները հարկավոր է փոխել շաբաթը մեկ անգամ, խորհուրդ են տալիս Ռոսպոտրեբնադզորի մասնագետները։
Ինչպես տեղեկացնում է ՏԱՍՍ-ը, սպասք լվալու սպունգը և դրա շուրջ տարածքը կարող են պարունակել մանրէների մոտ 360 տեսակներ։ Ավելին, միջին վիճակագրական խոհանոցային սպունգը կարող է լինել 200 հազար անգամ ավելի կեղտոտ, քան զուգարանակոնքի նստատեղը։
Հետազոտության ընթացքում խոհանոցային սպունգների վրա հայտնաբերել են խմորիչ և բորբոս (86 տոկոս), ինչպես նաև կոլիֆորմային մանրէներ, որոնք կարող են հանգեցնել սուր աղիքային վարակների (77 տոկոս)։ Սպունգների 18 տոկոսի վրա գտել են ստաֆիլոկոկային մանրէներ։
Վտանգավոր մանրէներ, մասնագետների խոսքով, կարող են հայտնաբերվել նաև լվացարաններում, խոհանոցի սեղանածածկին, կտրատման տախտակներին, սառնարաններում, խոհանոցային պարագաներում (սրբիչներ, սեղանի շորեր), աղբամաններում, ինչպես նաև կոմբայններում, մսաղացներում, բլենդերներում և հարիչներում։
Այս ախտածինների առաջացրած վարակներից խուսափելու համար խորհուրդ է տրվում լվացարանը լվալ ախտահանող նյութով, լավ չորացնել բոլոր մակերեսները և ամանեղենը և սրբել կենցաղային տեխնիկայի ու կահույքի բռնիչները։ Բացի այդ, խորհուրդ է տրվում շաբաթը մեկ անգամ լվալ սրբիչները, իսկ աղբամանները լվալ քլոր պարունակող նյութով առնվազն ամիսը մեկ անգամ։
