Տպել
Մարդիկ, ովքեր չափից ավելի շատ ժամանակ են անցկացնում գրասենյակում, ավելի հաճախ եմ բախվում զարկերակային բարձր ճնշման խնդրին, այդ թվում և քողարկված։ Այս մասին նշվում է նոր հետազոտությունում, որի արդյունքները հրապարակվել են Hypertension ամսագրում։
Լավալի համալսարանի (Կանադա) մասնագետները ուսումնասիրել են Քվեբեքի երեք պետական հաստատությունների ավելի քան 3500 ծառայողների աշխատանքի ռեժիմն ու առողջական վիճակը։ Նրանք համեմատել են շաբաթը ավելի քան 40 ժամ աշխատող մարդկանց զարկերակային ճնշումը նրանց ճնշման հետ, ովքեր աշխատում են մոտ 35 ժամ։
Պարզվել է, որ շաբաթը 49 և ավելի ժամ աշխատելու դեպքում քողարկված հիպերտոնիայի հավանականությունը բարձրացել է 70 տոկոսով։ Նման մարդիկ ցավ չեն ունենում բժիշկներին էպիզոդիկ այցելությունների ժամանակ, և նրանց թվում է, թե հիպերտոնիա չունեն։ Բայց բարձր ճնշումը կարող է որոշվել մշտական մոնիթորինգի դեպքում։ Հետազոտության համաձայն՝ հիպերտոնիայի կլինիկական ախտորոշման ռիսկը աշխատանքի նման ռեժիմի դեպքում ավելանում է 66 տոկոսով, իսկ շաբաթը 41 և 48 ժամ աշխատելու դեպքում՝ 42 և 54 տոկոսով համապատասխանաբար։
Գիտնականները հաշվի են առել նաև այնպիսի փոփոխականներ, ինչպիսիք են ծանրաբեռնվածությունն աշխատանքում, տարիքը, սեռը, կրթության մակարդակը, զբաղմունքի տեսակը, ծխելը, մարմնի զանգվածի ինդեքսը և առողջական այլ գործոններ։
«Մարդիկ պետք է իմանան, որ չափից ավելի երկարատև աշխատանքային ժամանակը կարող է ազդել նրանց սրտի առողջության վրա։ Քողարկված զարկերակային հիպերտենզիան կարող է վնասել մարդուն երկարատև ժամանակի ընթացքում և երկարատև հեռանկարում կապված լինել սիրտ-անոթային հիվանդությունների առաջացման ռիսկի հետ։ Հինգ տարվա ընթացքում 5 մարդուց առնվազն 1-ը, որ ունեցել է քողարկված հիպերտենզիա, երբեք բարձր զարկերակային ճնշում չի ունեցել կլինիկական պայմաններում՝ դանդաղեցնելով ախտորոշումն ու բուժումը»,- ասել է հետազոտության առաջատար մասնագետ Քսավիե Թրյուդելը։
