Տպել
Տղամարդիկ եւ կանայք հավասարապես հաճախ են վարակվում նոր կորոնավիրուսով, սակայն տղամարդիկ ավելի հաճախ են վերակենդանացման բաժին ընկնում եւ կրկնակի անգամ ավելի հաճախ են մահանում կորոնավիրուսից: Այս մասին նշվում է չինական փորձագետների նոր հետազոտության մեջ, որը հրապարակվել է Frontiers in Public Health-ում:
«Դեռ հունվարի սկզբին մենք նկատել էինք, որ COVID-19-ից մահացած տղամարդկանց թիվը մի փոքր ավել է, քան կանանց թիվը: Սա մեզ ստիպեց մտածել, թե ինչի հետ է դա կապված` SARS-CoV-2-ով վարակման հավանականության թե վիրուսի հետեւանքով մահվան: Ոչ ոք նախկինում նման հետազոտություն չի իրականացրել, ինչը մեզ ստիպեց հետաքննություն անցկացնել»,- ասել է Պեկինի Տունժեն հիվանդանոցի բժիշկը:
Ուհան քաղաքում COVID-19-ի համավարակի սկսվելու առաջին իսկ օրերից բուժաշխատողները սկսել էին նկատել, որ հիվանդությունն ավելի հաճախ վարակում եւ սպանում է տղամարդկանց, քան կանանց:
Իսկզբանե կենսաբաններն այս տարբերությունները կապում էին այն փաստի հետ, որ տղամարդկանց թոքերի բջիջները զգալիորեն ավելի շատ ACE2 ընկալիչի մոլեկուլներ են պարունակում, որոնք կորոնավիրուսն օգտագործում է օրգանիզմ ներթափանցելու համար:
Ցզինկույը եւ նրա գործընկերներն ուսումնասիրել են ինչպես իրենց սեփական հիվանդանոցում պացիենտների բուժման ընթացքում ստացված վիճակարգրությունը, այնպես էլ` Չինաստանի այլ հիվանդանոցների: Գիտնականներն ուսումնասիրել են տարբեր տարիքային եւ սոցիալ-տնտեսական կատեգորիաներին պատկանող ավելի քան 1000 հիվանդի բժշկական պատմությունը: Այս տվյալների վերլուծությունը ցույց է տվել, որ վարակման հավանականությունը մոտավորապես նույնն է եղել ինչպես տղամարդկանց, այնպես էլ կանանց մոտ, բայց COVID-19-ից բարդությունների զարգացման եւ մահվան հավանականությունը զգալիորեն տարբերվում էր: Կորոնավիրուսի զոհերի թվում տղամարդկանց մասնաբաժինը 70 տոկոս էր, ինչը բնորոշ էր նաեւ վերակենդանացման բաժանմունքում հայտնված եւ ԹԱՇ սարքերի կարիք ունեցող հիվանդներին:
Հետաքրքիր է, որ նմանատիպ պատկեր է գրանցվել նաեւ 2003-ին ատիպիկ թոքաբորբ տարած Չինաստանի բնակիչների մոտ: Ըստ գիտնականների` դա պայմանավորված է նրանով, որ դրա պաթոգենը եւս ACE2 ընկալիչներն է օգտագործում թոքերի եւ այլ հյուսվածքների բջիջների մեջ ներթափանցելու համար:
Տղամարդկանց և կանանց մոտ COVID-19-ի զարգացման բնույթի այսպիսի տարբերությունները, ըստ գիտնականների, պետք է հաշվի առնվեն ինչպես համավարակի հետագա զարգացումը կանխատեսելու, այնպես էլ կորոնավիրուսով վարակված հիվանդների բուժման մեթոդների ընտրության հարցում:
