Տպել
Վերջին 20 տարվա ընթացքում սրտի հետ կապված մահացության դեպքերը նվազել են, թեեւ տարբերությունները պահպանվում են ռասայական եւ էթնիկ պատկանելության, ինչպես նաեւ մարդկանց բնակության վայրի եւ առողջապահական խնամքի հասանելիությունից կախված:
Հետազոտողների արդյունքները հրապարակվել են երկուշաբթի Ամերիկյան սրտի ասոցիացիայի Circulation ամսագրում:
Հետազոտության մեջ օգտագործվել են ԱՄՆ Հիվանդությունների վերահսկման եւ կանխարգելման կենտրոնի տվյալները, եւ պարզվել է, որ 1999-ից 2019 թթ. սրտանոթային հիվանդություններից մահվան դեպքերի թիվը նվազել է ինչպես աֆրոամերիկացիների, այնպես էլ սպիտակամորթ մեծահասակների շրջանում:
Երկրորդ հետազոտության ժամանակ Աթերոսկլերոզի բազմաէթնիկ հետազոտության գիտականները նկարագրել են համանման ասոցիացիաները:
Հետազոտությունները ցույց են տալիս, որ քաղցկեղը հաղթահարածները սրտային հիվանդությունների ավելի մեծ վտանգի տակ են:
Հետազոտության շրջանակներում գիտնականները 15 տարի շարունակ հետեւել են ավելի քան 6800 մասնակցի: Այդ ընթացքում հետազոտության մասնակիցների մոտ 20 տոկոսը մահացել է։ Նրանցից 25 տոկոսը մահացել է սրտի հետ կապված պատճառներից։
Ընդ որում, իսպանացիների եւ ասիական ծագման ամերիկացիների շրջանում դիտվել է վաղաժամ մահվան ամենացածր ընդհանուր ռիսկը:
«Սրտային հիվանդության ավանդական ռիսկի գործոնների գնահատումից բացի, ինչպիսիք են շաքարախտը, ընտանեկան պատմությունը, արյան ճնշումը, խոլեստերինի մակարդակը եւ ծխելը, այս հետազոտությունը ցույց է տալիս ռիսկը հաշվարկելիս առողջության սոցիալական որոշիչ գործոնների բացահայտման կարեւորությունը»,- պատմել է հետազոտության համահեղինակ Բալթիմորի Ջոն Հոփկինսի համալսարանի բժշկական դպրոցի սրտանոթային հիվանդությունների հետազոտութունների բաժնի տնօրեն Վենդի Փոստը:
