Տպել
Լուիզա Ղամբարյանի աշխատանքային առօրյան այժմ խիստ հագեցած է: Երկար դադարից հետո նա պատրաստվում է ներկայանալ երկու նոր սերիալում, ինչպես նաև երկու նոր թատերական ներկայացումներում: Իր մասնակցությամբ նոր նախագծերի մասին դերասանուհին պատմել է BRAVO.am-ին:
«Այս երեք տարիների ընթացքում եղան առաջարկներ, որոնք տարբեր պատճառներով իմ կողմից հավանության չարժանացան: Բայց շուտով` դեկտեմբեր 4-ից, Հանրային հեռուստաընկերությամբ կցուցադրվի «Բացիր աչքերդ» 40 մասանոց նոր սերիալը, որտեղ ներկայանում եմ բավական նոր և ուրույն կերպարով` փոքր-ինչ չոր և զուսպ բնավորությամբ: Մարմնավորելու եմ ծերանոցի տնօրենի կերպարը, ով ծանր կյանքով է ապրել, բայց մի շրջափուլից հետո նրա վերաբերմունքը փոխվելու է կյանքի հանդեպ, իսկ չոր բնավորությունը՝ փափկելու: Այսինքն` սերը կփոխի ամեն ինչ… Կարծում եմ՝ շատ հետաքրքիր է լինելու»,- ասաց Լուիզան:
Մյուս նախագիծը, որին մասնակցելու է դերասանուհին, եթեր կհեռարձակվի եկող տարվա սկզբին՝ «Արմենիա Պրեմիում» հեռուստաալիքով: Լուիզա Ղամբարյանի խոսքով՝ նկարահանումներն արդեն մեկնարկել են, բայց մանրամասներ պատմելը դեռ վաղ է:
Հեռուստատեսային այս դադարի ընթացքում նա ակտիվորեն ներգրավված է եղել թատերական ներկայացումներում: Հիմա էլ պատրաստվում են նոր ներկայացում բեմադրել` Թեննեսի Ուիլյամսի «Տրամվայ «Ցանկություն»» պիեսի հիման վրա: Հայ թատրոնի պատմության մեջ արդեն երկրորդ անգամ է բեմադրվում ամերիկացի հեղինակի այս հայտնի ստեղծագործությունը: Մինչ օրս Սուրեն Շահվերդյանի բեմադրությունը Սունդուկյանի անվան ազգային ակադեմիական թատրոնի խաղացանկում է և անցնում է հանդիսատեսի ջերմ ընդունելությամբ ու լեփ-լեցուն դահլիճով: Գլխավոր դերերում հանդես են գալիս Նելլի Խերանյանը և Մուրադ Ջանիբեկյանը:
Այժմ Սուրենը նույն պիեսը բեմադրում է Հ. Ղափլանյանի անվան դրամատիկական թատրոնում՝ այս անգամ արդեն նոր դերասանների մասնակցությամբ:
«Սա հրաշալի գործ է: Վստահ եմ` թե՛ հանդիսատեսի, և թե՛ դերասանների համար շատ հետաքրքիր է լինելու: Գլխավոր դերերում հանդես ենք գալու ես և Ստեփան Ղամբարյանը. որոշել ենք Ղամբարյաններով ներկայանալ բեմում (ժպտում է,- հեղ.): Ես հանդես եմ գալու Բլանշի կերպարում: Հիմա փորձասենյակային աշխատանքներ են տարվում, կարծում ենք` փետրվարի վերջին արդեն հանդիսատեսի դատին կհանձնենք»,- նշեց Լուիզան: Ի դեպ, BRAVO.am-ն առաջիկայում առավել մանրամասն կպատմի ներկայացման մասին:
Ամբողջությամբ՝ bravo.am
