Տպել
Հարկային չարաշահումների համաձայնությունները կայացվել են վարչապետի մակարդակով։ ՊԵԿ նախագահը ներկայացրեց կոռուպցիոն համաձայնությունների մանրամասները։
Հարկային մաքուր դաշտ գալուց և ԱՁ 5 տոկոսի փոխարեն շրջանառության 20 տոկոսը հարկ վճարելու արդյունքում գյուղմթերքների գները կարող են աճել։ Մասնագիտական շրջանակներում հնչող այս մտահոգություններն այսօր լրագրողների հետ զրույցում չհերքեց ՀՀ պետեկամուտների կոմիտեի նախագահ Դավիթ Անանյանը։
«Ե՛վ մամուլում, և՛ կարծեմ Վահրամ Բաղդասարյանն էր այդպիսի միտք արտահայտել, որ ժամանակին ինչ-որ պայմանավորվածություններ են եղել` խուսափելու 50-60 տոկոս գների հնարավոր աճից։ Խնդիրն ավելի պարզ ու հասարակ է։ Եթե մենք ասում ենք, որ տնտեսվարողները պետք է գործեն բացառապես օրենքի շրջանակներում, նշանակում է, որ եթե սուպերմարկետն աշխատում է ԱԱՀ դաշտում, պետք է վճարի հարկերն ամբողջ ծավալով։ Եթե դրա արդյունքում գյուղմթերքն ու մսամթերքը պետք է 50-60 կամ որևէ այլ չափով գնագոյացման աճ ունենան, կնշանակի, որ կողքի փոքր խանութներն ավելի մրցունակ կդառնան»,- ասաց Անանյանը` հավելելով, որ կառավարությունը գների բարձրացման դեպքում կհետևի` հասկանալու համար, թե որքանով է այդ գնագոյացումն արդարացված։
«Եթե կլինի արդարացված, մենք որևէ խնդիր չենք տեսնում, և ՊԵԿ-ը գների զսպման հետ պետք էլ չէ, որ գործ ունենա»,- ասաց Անանյանը` միաժամանակ չբացառելով, որ անհրաժեշտության դեպքում կարող է հարկային օրենսդրության վերանայման անհրաժեշտություն առաջանալ, ինչի առաջարկով ՊԵԿ-ը կդիմի կառավարությանը։ Իսկ քանի դեռ գործում է ներկա օրենսդրությունը, բոլորը պարտավոր են այն հարգել։
Ինչ վերաբերում է ՊԵԿ նախկին ղեկավարների և հարկային չարաշահումներ թույլ տված գործարարների միջև պայմանավորվածություններին, Դավիթ Անանյանը հաստատեց, որ նման համաձայնություն եղել է` ընդ որում` ոչ միայն ՊԵԿ նախագահի, այլև վարչապետի մակարդակով։
«Այդ համաձայնություններ ավելի բարձր մակարդակում հավանության են արժանացել։ Ես ՊԵԿ-ի որևէ պաշտոնյայի անուն չեմ կարող առանձնացնել, որովհետև համակարգն է համաձայնության եկել։ Եթե որոշ պաշտոնյաներ ինչ-որ առաջարկներ են արել, և այդ առաջարկները երկրի ղեկավարության հետ քննարկումների արդյունքում համաձայնության են եկել, մենք իրավունք չունենք ասելու` ՊԵԿ-ի այս կամ այն աշխատակիցը առաջարկ է արել, որի արդյունքում այսպիսի իրավիճակ է ստեղծվել»,- ասաց Անանյանը։
Նա նշեց` մինչև վարչապետի մակարդակով եղել է համաձայնություն, որ գյուղմթերքների գնային շեղումներ չլինեն։
Իսկ թե գործարարներից, ՊԵԿ-ի և երկրի ղեկավարներից ովքեր կպատժվեն այդ համաձայնության համար, Դավիթ Անանյանն առաջարկեց սպասել քննության ավարտին ու համոզվել, որ համաձայնությունները եղել են ապօրինի։
