Տպել
Մաստակը կարող է օրգանիզմին օգուտ տալ և նպաստել նիհարելուն, եթե այն ծամեք քայլելիս: Այսպիսի եզրահանգում են կատարել Տոկիոյի Վասեդա համալսարանի ճապոնացի գիտնականները:
Մասնագետները հետազոտել են 21-69 տարեկան 46 տղամարդկանց և կանանց: Նրանց 2 խմբի են բաժանել: Առաջին խմբի ներկայացուցիչներին տվել են մաստակի 2 բարձիկ (յուրաքանչյուրը 3 կկալ), որ ծամեն 15 րոպե իրենց բնական տեմպով շարժվելիս: Երկրորդ՝ ստուգիչ խմբին մաստակի փոխարեն բաժին է հասել փոշի, որը նույնպիսի բաղադրիչներ ուներ:
Երկու խմբերը 15 րոպե քայլել են մեկ ժամ հանգստանալուց հետո:
Երկու դեպքում էլ գիտնականները չափել են սրտի կծկումների հաճախությունը (ինչպես հանգստանալու, այնպես էլ շարժման ժամանակ), նրանց անցած տարածությունը և էներգիայի ծախսը:
Պարզվել է, որ առաջին խմբից փորձի մասնակիցների մոտ սրտի կծկումների հաճախությունը 2 անգամ բարձր է եղել, քան ստուգիչ խմբի ներկայացուցիչների մոտ:
Առավել դրական արդյունք է գրանցվել տարեց մարդկանց շրջանում:
«Մեր հետազոտությունը ցույց է տվել, որ զբոսնելիս միջին տարիքի մարդկանց մաստակ ծամելը մեծացրել է տարածությունը և էներգիայի ծախսը, հատկապես տարեց տղամարկանց դեպքում»,- պնդում են հետազոտության հեղինակները:
Նրանք նաև ընդգծում են, որ համակցելով վարժությունները և մաստակը, կարելի է սեփական քաշն արդյունավետորեն վերահսկել:
Նկատի ունենալով մեթոդաբանական սահմանափակումները՝ գիտնականները չեն կարողացել հաշվարկել ծամելու գործողությունների ճշգրիտ քանակությունը: Նրանց տեսանկյունից հետագա հետազոտություններում անհրաշետ կլինի այս գործոնը հաշվի առնել ցուցանիշների ավելի ճշգրիտ չափման համար:
«Մաստակի ազդեցությունը ֆիզիկական և ֆիզիոլոգիական ֆունկցիաների վրա» կոչվող հետազոտությունը ներկայացվել է Ավստրիայում տեղի ունեցած ճարպակալման դեմ պայքարին նվիրված համաժողովում և հրապարակվել է Journal of Physical Therapy Science ամսագրում:
